Lider di MEP Evelyn Wever-Croes:
ORANJESTAD (AAN) – Señora mr.Evelyn Wever-Croes, lider politico di Partido Movimento Electoral di Pueblo (MEP), despues di a reuni cu Gobernador Boekhoudt, a haci un declaracion pa DIARIO.
El a expresa cu partido MEP lo a prefera un resultado diferente. Su gobierno a traha hopi duro, y henter mundo a reconoce Aruba su crecemento y su recuperacion impresionante.
“No mas cu aki na Aruba, pueblo a dicidi diferente. Sinembargo, despues di hopi analisis nos ta hopi satisfecho. Si wak bon, un partido despues di dos gobernacion, siete aña den gobierno, ta mantene forza, ta mantene 8 asiento, a bay atras cu apenas 11% di voto, ta algo hopi, hopi grandi”, Wever-Croes a señala.
El a sigui bisa cu si compara e resultado aki cu otro partidonan cu den pasado, despues di dos gobernacion, a bay atras cu mas di diez mil voto; por ehemplo, partido AVP na 2017, MEP mester ta hopi contento cu e resultado aki.
“Ademas, nos a keda e partido mas grandi den cuater di seis distrito di Aruba: Noord, Paradera, Santa Cruz y Savaneta, y esaki tambe ta algo cu nos ta hopi contento cu ne”, Lider di MEP, Evelyn Wever-Croes a señala.
El a reitera su felicitacion pa Partido FUTURO y Partido PPA, cu a saca asiento nobo den Parlamento, y un biaha mas a felicita Partido AVP cu a sali e partido mas grandi.
Wever-Croes a agrega cu awo e proceso di informacion y formacion ta cuminza, y su reunion cu Gobernador den nomber di MEP, Diamars mainta, tabata un bon reunion.
“Tabata tin varios pregunta, con nos ta mira e resultado di eleccion, con nos ta interprete, con nos ta mira un Gabinete den futuro, y nos a duna nos punto di bista.
Partido Movimiento Electoral di Pueblo, na e momentonan aki, no ta e prome yama pa bay forma un gobierno. Nos no a sali e partido mas grandi, pero nos ta dispuesto si, na forma parti di tur e negociacion, nos ta dispuesto pa ta na mesa, y despues wak si nos por forma parti di un gobernacion den futuro”, Lider di MEP, Evelyn Wever-Croes a relata.
Kiermen, MEP ta habri pa negocia cu cualkier partido cu ta interesa y nan ta pendiente di esey, pero nos no ta e prome yama. “Di akinan mi kier desea nan hopi exito; mi kier desea e formador cu lo wordo nombra, hopi exito y nos lo ta pendiente di e combersacion cu informado tambe”, señora Evelyn Wever-Croes, Lider di Partido MEP a señala.
