Parlamentario Evelyn Wever-Croes: Gobierno falta liderazgo y transparencia
ORANJESTAD (AAN): Diaranson atardi a wordo yama un reunion relampago den Parlamento pa asina haya aprobacion pa señor Baba Herde por huramenta como Minister di Infrastructura y Energia. A duna parlamentarionan apenas 15 minuut pa yega Parlamento pa atende e reunion. Durante e reunion aki tanto partido Futuro y partido AVP a bai di acuerdo cu dicho proposicion y asina a aproba nombracion di señor Herde.
Parlamentario Evelyn Wever-Croes a indica cu pa su persona e ta hopi straño con presidente di Parlamento por a yama e reunion aki asina liher, mirando cu fraccion di MEP tin lunas ta pidi pa diferente reunionnan y nan no ta wordo yama.
Pa loke ta e tema di e reunion, Parlamentario Wever-Croes a indica cu pais Aruba pa 3 luna no conoce liderasgo ni un gobierno completo tampoco, y cu nombracion di e minister nobo aki, ainda e gobierno no ta completo mirando cu ainda falta e minister plenipotenciario na Hulanda cu en realidad ta hopi necesario. Parlamentario Wever-Croes a caba di bolbe di un biahe na Hulanda, y eynan por a scucha y mira cuanto falta e GevMin di Aruba ta hasi. E falta di tuma decision aki di e gabinete Eman-Croes ta causando danjo na e imagen di Aruba.
Tambe e Parlamentario a mustra riba e falta di transparencia den ultimo 3 lunanan, indicando cu tin hopi pregunta haci pa no solamente pa fraccion di MEP – mas cu 800 - sino tambe pa AVP-Futuro - mas di 200 - cu no ta wordo contesta pasobra gobierno no ta yega Parlamento pa duna contesta y no ta contesta e preguntanan hasi por escrito tampoco.
Tambe Parlamentario Wever-Croes a expresa su preocupacion cu gobierno, djies pa yena un cartera, ta trece un pensionado aden pa ocupa dicho poscion. E cartera di Infrastructura y Energia tin hopi reto y investigacionnan penal andando y lo mester hopi atencion. Mas pio ainda ta e echo cu nan ta declara cu señor Mike de Meza cu ta un parlamentario lo yuda señor Herde y dun’e conseho. Esaki ta un violacion di nos constitucion y di nos trias politica. Ta bisto cu e meta tras di pone un pensionado den e funcion aki ta pa señor den Meza por sigui “Wheel and deal” manera cu e ta desea.
Parlamentario Wever-Croes finalmente a expresa cu Mike Eman como lider di AVP poniendo sr. Herde como minister cu no ta riba lista di AVP, ta dunando un bofta den cara di tur e candidatonan riba su lista y specialmente e hobennan. Den Parlamento tin hende cu hopi experiencia, cu tabata director di departamento, cu tabata tin posicionnan clave den enseñansa y den companianan estatal cu por a tuma e funcion aki. Pero na fin di dia mayoria di parlamentarionan di AVP y Futuro mes a aproba e nombracion aki y e ‘brevet van onvermogen’ di nan lider.
“Personalmente mi no ta kere cu esaki ta e miho escohencia paso mi no ta kere cu señor Herde tin e conocemento necesario pa maneha un cartera asina importante. E nombracion aki lo laga espacio pa otro influencianan sigui “Wheel and deal” manera e gobierno aki ta custuma.
Mi ta spera cu esaki lo conduci cu nos lo mira liderasgo den e pais aki y cu e gobierno aki lo cuminsa funciona y tuma decision. No por frena e desaroyo di pais Aruba paso pa 7 aña y mei Aruba a conoce diferente, un gobierno cu liderasgo y gobernacion firme den tempo bon, malo y hopi malo. E ta importante pa e gobierno aki cuminsa traha di berdad y crea un Aruba realmente dushi pa nos biba riba dj’e” Parlamentario Wever-Croes a expresa.
