Eduard Pieters di PPA:
ORANJESTAD (AAN): Eduard Pieters, di Partido PPA, a expresa den conferencia di prensa, cu varios biaha el a trece dilanti cu no ta awo sino di hopi aña caba, maestronan ta lucha pa un miho salario, of pa nan sistema salarial, wordo restructura.
Pa loke ta trata e ultimo añanan, for di 2023 a bin cu un proposicion riba mesa, anto nan a negosha esaki cu e Comision den e Gobierno anterior, anto nos ta ripara cu esaki despues di un tempo SIMAR no a tende nada mas di gobierno.
“SIMAR, y mi ta haya hopi bon cu nan a hacie, a duna gobierno espacio pa nan por a studia kico ta e proposicion riba mesa, pero SIMAR no ta haya e atencion of respuesta riba nan peticionnan”, Pieters a comenta.
El a subraya cu e ta haya esaki hopi grave, pasobra pasobra no ta un lucha di awo. El a cuminza den tempo di AVP, despues MEP, awo atrobe AVP cu Futuro ta na mando.
“Dus, ban duna e respet na nos sindicatonan. Mi no ta gusta bay den pasado, pero si nos ta bay na aña 2008, cu aki’ riba, akinan tabata tin un manifestacion pa 7-8 siman largo nos no mag bay bek, y nos no mag lubida kico a pasa e tempo ey. Pasobra e tempo ey, el a influencia e eleccion na 2009. Pasobra si nos corda bek tabata un manifestacion grandi caminda a ocasiona cu e gobierno cu tabata na mando e tempo ey a cay pisa! Y mi no ta kere cu ningun gobierno kier pasa den esaki”, Eduard Pieters, di Partido PPA, a señala.
