ORANJESTAD (AAN) – Como Lider di Partido MEP, Evelyn Wever-Croes a menciona cu ya durante e campaña caba, tabata tin indicacion kico ta locual tin den cada partido nobo, cu a saca asiento como resultado di eleccion 2021.
“Bo tabata mire, nos conoce algun di e integrantenan caba, pero nan a logra di haya voto; kiermen, nan a haya otro impresion di confianza cerca algun votador, y bo tin cu respeta esey. E decision di pueblo bo tin cu respete! Nos tabata sa kico lo tin den dje y eigenlijk awo nos ta haya confirmacion di esey”, Wever-Croes a expresa.
Riba e pregunta si MEP ta enfoca su mes awo riba un base amplio, of e ta haya cu 11 asiento ta suficiente, dependiendo di con e vision di e otro partidonan ta, e lider di MEP a contesta cu e tambe a scucha un lider bisa cu mester di 14 asiento, pasobra tin leynan cu mester di esey.
“Na e momentonan aki, por ehemplo e Landspakket no ta exigi 14 asiento. Tin leynan cu si, por ehemplo, nos a purba di hinca e ombudsman den nos Constitucion, un par di luna pasa, y p’esey tabata tin mester di 14 y nos no tabata tine. A para e tratamento pero e ta bay sigui un djis. Anto, e ora ey, riba e temanan bo por purba di yega e fuentenan pa bo yega na bo 14. Kiermen, no mester di 14 pa goberna, bo mester por lo menos 11, pa goberna”, Wever-Croes a señala.
El a comenta cu biaha pasa nan por a goberna cu 11 asiento, pero nan a goberna cu 12 pasobra nan kier a busca e base mas amplio posible. “E no a duna nos e trankilidad ni stabilidad. Aworaki, cu e experiencia cu nos tin tras di lomba, nos ta busca no tanto den e cantidad, sino den stabilidad”, Wever-Croes a remarca.
