E no ta comparti mas nan vision
ORANJESTAD (AAN): Mas miembro di AVP mustrando nan desapunto den e partido. Ademas di Ryçond Santos do Nascimento y Gerlien Croes, riba Diamars a haya sa cu e dama Muzaninn Wever a retira tambe di e Partido Berde. El a confirma cu el a entrega su retiro como candidato na e lider Mike Eman. Muzaninn ta yiu muher di defunto Mary Wever-Lacle, un pilar grandi den historia di e partido.
“E razon di mi retiro ta serio pero simpel pa compronde: mi a realisa cu mi no ta comparti e vision di partido y ta sinti cu ken mi ta (esta un persona profesional, critico pero vooral di principio) no ta pas den e constelacion actual di partido.”
“Den palabra di mi difunto mama, mi semper tawata AVP pero “by choice, not by chance”. Y esey tabata pasobra mi semper a kere den e ideologia di partido, e base fundamental cu a uni nos. AVP ta e partido di solucion y esun cu e vision progresivo pa futuro, e partido di personanan cualifica, profesional y cu un amor pa nos pais.” El a mustra con den e antesala pa eleccion 2021, prome cu gobierno a cay mes, AVP a envolvi candidatonan, candidatonan potencial, activista y dirigentenan di bario den conversacionnan pa fiha un futuro pa partido. “Den esaki nos tur a carga e vision e.o pa renobacion di partido, pa presenta nos mes como e unico opcion pa trece prosperidad bek na nos pueblo, pa atrae young professionals cu gana pa sirbi Aruba. Mi a contesta e yamada aki y a acepta e reto cu speransa di por contribui positivamente na desaroyo y cambio real pa Aruba, pero tambe pa Partido, cu un vision nobo, un biento fresco pero cu sosten di e hala di experiencia. Esaki tawata mi expectativa.”
Partidonan, y AVP no ta excepcion, ta pasa den periodonan di gloria y periodonan di reto. Normalmente hunto nos ta yega na solucion tanten tur hende ta actua di buena fe, respeta otro y primordialmente, papia berdad. El a bisa cu loke a pasa ultimo simannan, principalmente e conflicto entre Ryçond y Gerlien na un banda, y Mike de Meza na otro, y tambe e consecuencianan pa partido relaciona cu e decision di huez pa e caso di Benny Sevinger, lamentabelmente a causa un realisacion cu loke Muzaninn ta kere aden y para pe no ta alinea cu Partido. “E diferencia den pensamento ta demasiado grandi y pa cual mi no por ofrece defensa.”
Segun Muzaninn, e dos rapportnan devastador di CAD encuanto e acuerdo entre ex-minister Briesen y Tafonelli, e conseho positivo di un hurista di cassacion pa continua cu e caso contra Briesen y e contract entre Gobierno di Aruba (de Meza) y Briesen pa libr’e di tur persecusion den futuro, tur esaki ta un malhecho den dia cla. No divulga e documentonan aki na bo coleganan den parlamento ta haci e malhecho mas grave ainda. Y pa net e coleganan wordo demonisa den nan mesun partido pasobra nan a wordo gaña ta manera culpa e victima y eleva e agresor.
Ta conoci cu Sevinger tin dos decision di culpabilidad di huez. E hecho cu e caso a cuminza cu un persecusion politico no ta e punto pasobra, asina mes, toch huez a constata dos acto condenabel. Ta posibel cu despues di apela e decision di huez, e wordo libra di culpabilidad. Esaki no ta kita afo cu awo, na e momento aki, e ta culpabel den wowo di ley. Y pa e periodo cu su caso ta pendiente, esaki no ta cambia. E hecho aki lo continua hasi daño na e credibilidad y reputacion di partido y tur cu ta asocia na dje.
“Sin e paso aki (di retira), sea temporario te ora e situacion drecha of permanentemente si mester, confiansa publico den gobierno ta cai. Pio ainda, incidentenan di malhecho cu ta ripiti cu no ta produci un splicacion acceptabel of un investigacion transparente ta crea un cynicismo peligroso. No duda! Un gobierno cu ta nenga di seriamente reconoce y atende cu malhecho veridico of malhecho potencial of conflicto di interes door di su miembronan, ta haci daño no solamente na su mes. E ta causa daño na e propio caracter di e nacion...”
Acepta, tapa, sconde y no reconoce ora algo ta inacceptabel of incorecto ta fomenta e daño di e caracter di nos pais. Personanan den posicion ta carga un responsabilidad mas grandi pa para riba nan orguyo. Nan mester pensa riba e Pueblo y ki daño e desconfiansa den e organisacion cu nan ta representa por crea di un malhecho mes of e percepcion di un malhecho. E idea cu partido mester tin loyalidad na cualke individuo no ta sostenibel; lealtad mester ta pa pueblo.
Ta incorecto pa para banda di esun cu a libra un politico di a comete un acto contra ley di comptabilidad y keda keto riba su rol den libr’e pa despues pueblo tin cu carga cu e gasto. Of den e otro caso hasta celebra cu no ta tur 6 acusacion sino dos “so” a haya culpabilidad. Similar, no tin diferencia di culpabilidad si bo horta 100 florin of 20 florin. No atende debidamente cu ta compromete e credibilidad di e organisacion, ta mancha tur esnan cu ta parti di dje, ta descurasha otro profesionalnan cu aspiracion pa drenta politica y ta manda un señal robes pa pueblo.
Pueblo ta continuamente sclama pa un politica nobo, un politica limpi, un politica cu no ta den beneficio propio sino den beneficio di tur. Pa logra e meta aki mester evita e minimo apariencia di malhecho of conflicto di interes. Un politica nobo ta rekeri pa nos tur kita e bril partidario y wak hecho y duna credito of critica ora esaki ta mereci, ken cu e por ta, y mas ainda ora ta trata esnan den nos mesun circulo. Ora e control interno faya, e impresion publico di politica y di e politico ta sufri un kiebre ireparabel. E forma di politica mester experiencia un cambio. Na final Muzaninn a gradici tur votadornan durante eleccion 2021, y el a bisa di lo sigui sirbi pueblo den mi funcion diario y via organisacionnan cu e ta forma parti di dje.
