ORANJESTAD (AAN): Diabierna mainta Departamento di Impuesto a organiza un mainta special pa su empleadonan relaciona cu Dia di Belasting. Minister di Finansa tabata presente y a hiba palabra. Den su discurso e mandatario a trece dilanti cu awe ta recorda Dia di Belasting cual ta 1 di december y ta un bon momento pa nos, funcionarionan di gobierno, reflexiona riba e logronan di un organizacion asina importante pa recuperacion di nos pais.
Departamento di Impuesto tin un tarea cu ta carga un responsabilidad inmenso y cu no tur ora ta facil. Enforsa cumplimento di pagonan di impuesto
tin su retonan y mey mey di tur e retonan aki, nos belastingambtenaar ta percura pa colecta entrada di impuesto pa asina Aruba henter por beneficia di e frutanan.
Minister Maduro a acentua cu sin nos esfuerzonan y determinacion den nos trabao nos pais no por sigui progresa. E logronan di awe ta danki na perseverancia y dedicacion di cada un di trahadornan na Departamento di Impuesto cu ta haci e diferencia na pia di trabao. Desde pandemia, nos pais a confronta diferente reto riba tereno di entrada di impuesto y nos economia.
E mandatario a trece dilanti pa laga nos no perde for di bista cu nos tin cu sigui traha hunto pa logra e metanan nos dilanti. Nos ta hunto riba e caminda pa mehoracion, pues laga nos sigui inspira y motiva otro tumando iniciativa y asumiendo e responsabilidad pa nos metanan stipula.
Minister Maduro ta felicita henter e ekipo di Departamento di Impuesto pa e inmenso trabao den e ultimo lunanan pa logra elimina e famoso atraso den procesamento di cobranza y restitutie di varios aña. Danki pa trece e organizacion up to date den 2022.
