ORANJESTAD(AAN)- Den regreso pa normal, e forma cu cada hende lo tin un entrada, lo bira sumamente importante.
Informacionnan cu DIARIO a ricibi ta papia di e forma cu Ministro di Asuntonan Social lo reemplasa e asistencia social di FASE, cu un concepto nobo bou e nomber di Tijdelijke Inkomsten Ondersteuning.
Lo ta trata aki di un sistema nobo pa brinda asistencia financiero na ciudadanonan cu problema riba tereno social, cu lo no haya solamente placa den nan man pa un temporada limita, pero cu ta habri caminda pa ciudadanonan cu por percura pa cubri nan propio gasto, por gana nan pan pa medio di trabou.
DIARIO a discuti e materia cu expertonan cu a indica, cu bon gobernacion ta exigi pa asistencia financiero di Gobierno, wordo brinda na personanan cu realmente no por percura pa nan propio entrada.
Segun e informantenan experto riba tereno social, na momento cu Covid-19 a bati na porta, Aruba mester a percura pa un vangrail pa tur e personanan cu a perde nan trabou y a keda sin entrada.
“E no tabata un encargo facil. Aruba tabata den un crisis debi na e maneho financiero cu el a hereda di gobierno anterior. E maneho cu Aruba mester a hiba te na momento cu Covid-19 a bati na porta, tabata uno di baha gasto y hiba e propositonan di ley atrobe na nan via normal,” a wordo indica.
Informantenan a indica cu asisrtencia social ta uno di e puntonan cu bon gobernacion a exigi pa wordo bon studia y pa pone den un contexto, cu placa cu un comunidad tin pa yuda personanan cu no por percura pa nan propio entrada, no wordo uza pa personanan cu por gana nan pan sin yudansa di Gobierno.
“E conceptonan cu awor ta wordo presenta, ta hiba nos atrobe na e reis di leynan social. Gobierno cu tin e fondo di placa di Pueblo, mester yuda personanan cu no por yuda nan mes. Personanan cu por participa na e proceso di labor, mester haci esaki pa sigura nan entrada personal,” informantenan a indica.
Pa splica nan posicion nan a mustra riba e base di e leynan aki for di nan introduccion na Aruba.
Informacion cu DIARIO tin a mustra, cu for di prome cu e pandemia a afecta condicionnan di bida na Aruba, ya e Ministerio di Asuntonan Social cu ta resorta bou Glenbert Croes, a cuminsa cu estudionan importante pa mira con den futuro na forma efectivo por conduci leynan social na nan exigencia basico pa asina por sirbi e comunidad.
Na e momentonan aki, Gobierno Wever-Croes a traha riba formanan pa amplia e base economico, cu mester produci trabou.
Pues ta crea oportunidad pa hende cuminsa traha na empresanan mientras cu por spera cu ora proyectonan cu ta spera cu lo bira realidad, habri nan porta, Arubianonan por traha riba nan mes y por haci uzo di paketenan special di belasting alivia cu Gobierno a introduci.
Informantenan a aplaudi cu Ministro Glenbert Croes ta atende e asunto di asistencia financiero na un forma sostenibel y cu responsabilidad.
Gobierno pues mester habri empleo, pero segun e sistema nobo, durante e tempo cu un persona ta haya asistencia financiero social, tambe yuda e persona haya trabou pa como parti di e forsa laboral e por tin su ingreso.
“Esaki tabata e base di asistencia financiero social for di momento cu el a wordo introduci na e pais,” informantenan a indica. Nan ta considera e plannan di Ministro Glenbert Croes cu e TIO cu lo reemplasa FASE, como muestra di un solucion cu por ta duradero pa e hecho cu e pais lo por sostene e yudansa den futuro y no ta compremete su mes na un sistema permanente, cu e pais lo no por carga mas na den un normal nobo.
DIARIO lo sigui amplia riba e retonan social di actualidad y discuti e pakete di plannan di Ministro Glenbert Croes, cu a wordo encarga cu uno di e partinan mas pisa di impacto di Covid-19 riba Aruba.
