Tocante comentario di Parlamentario Molina:
ORANJESTAD (AAN) – minister Ursell Arends a haci un parenthesis den e conferencia di prensa, tocante e meta di RAIZ di trece cambio den politica, pa enfoca riba un tema specifico cual ta Integridad.
E mandatario a comenta cu na final di e reunion cu e Comision di Parlamento, el a tuma nota cu Parlamentario Molina a sali declara cu integridad no mester ta e meta.
“Wel, mi kier bisa cu pa nos tur cu ta sinta akinan como RAIZ, y sigur pa mi como Minister di Integridad, ‘Integridad ta e meta!’ Nos kier garantiza integridad den tur e proceso pa loke ta trata con Gobierno ta opera, y esaki ta algo cu comunidad di Aruba tambe kier wak. Pa Comunidad di Aruba, integridad ta e meta! Y e Parlamentario ta sali mustra na unda e ta para y mi kier bis’e cu nos si ta para fuerte pa integridad, pasobra nos si ta traha pa garantiza integridad den tur e procesonan publico, pa pueblo di Aruba por tin confianza den su gobernantenan. Esaki ta e meta pa cual nos ta traha y esaki ta e base cu nos ta tuma decisionnan tambe”, Minister Ursell Arends a subraya.
El a agrega cu RAIZ tin un bon relacion cu tur su coleganan den gobernacion, nan ta traha a base di respet mutuo. “Pesey nos ta yama nos mes un plataforma, pasobra tur hende sinta akinan ta profesional, y nos ta dedica nos mes na trece cambionan structural cu ta na beneficio di e comunidad di Aruba”, e dignatario a remarca.
