Parlamentario Edgard Vrolijk na Minister Gerlien Croes:
ORANJESTAD (AAN): Durante e reunionnan di IPKO cu a tuma lugar fin di Februari, tabata tin un tema cu a resalta bou di e delegacion Hulandes: e biahe den jet priva di Minister Gerlien Croes. Den combersacion cu dos ex-Hues, kendenan tin un bista skerpi riba e materia aki, nan a expresa cu tin dos punto critico cu Minister Croes no por sigui ignora: transparencia absoluto y e reglanan estricto riba regalonan (gifts) pa un mandatario den funcion.
Un insulto na nos Constitucion y e derecho di Parlamento: Ta un berguensa nacional cu un Parlamentario mester acudi na un peticion di LOB (Ley di Openbaarheid van Bestuur) pa por haya informacion cu mester ta publico y accesibel. Den un democracia saludabel y den e resto di Reino, ta un norma cu un Minister ta duna cuenta di su biahenan y gastonan sin pone tanto ‘pero’ na e asunto.
Articulo III.16 di nos Constitucion ta duna un Parlamentario e derecho sagrado di ricibi informacion.
Preguntanan manera "Cuanto e jet a costa?" y "Ken a pag’e?" ta simpel, directo y fundamental. Si Minister Croes ta afirma publicamente cu e mes a paga pa e biahe di trabao aki, e ora e tin e obligacion moral y legal di duna e prueba di pago. Transparencia no ta wordo bisa cu palabra, e ta wordo demostra cu recibo.
E bista riba Ley di Integridad: Un regalo of un infraccion? Si e Minister no por proba cu e mes a paga, e situacion ta bira legalmente precario. Conforme e Ley di Integridad, un biahe asina ta keda categorisa como un "gift" (regalo). Articulo 13 di e ley aki ta prescribi cu mester declara cualkier regalo dentro di un termino rasonabel. E termino ey a caduca caba.
Mas ainda, e Ley di Integridad ta dicta cu e Prome Minister mester informa Parlamento si un mandatario a ricibi regalonan. Esaki no ta un cuestion di "persigui" un Minister mane Minister Gerlien Croes kier pretende. Esaki ta un cuestion di exigi cumplimento cu e ley cu nos mes a vota pe den sala di parlamento. Ley ta ley, y pa un Minister, e mester ta e prome pa duna e ehempel.
E Codigo di Conducta: E limite di 250 Florin. Un otro punto unda e Minister ta den un disputa legal ta e Gedragscode (Codigo di Conducta) vigente pa ministernan. Articulo 5 ta bisa bon cla: un Minister y su pareha mester registra tur regalo. Sea ta placa, servicio, of un buelo den jet priva.
E regla di oro: Si e regalo ta bal mas cu 250 Florin, e Minister tin e deber legal di nenga esaki.
Un biahe den jet priva ta costa miles di Florin. Pues, pa cuminsa, legalmente e no por ni wordo "registra" pasobra e ta sobrepasa e limite permiti. Si e Minister a acepta e biahe aki como regalo, el a actua contra e Codigo di Conducta. Si e mes a pag’e, pakico e tin miedo di mustra e transfer anto?
Conclusion: Entre integridad y e berdad: Minister Gerlien Croes ta kibrando un derecho constitucional door di keda sin duna informacion. Den Reino esaki ta inaceptabel. Ora un Minister declara cu e mes a paga, e ta pone su mesun integridad den wega.
Si e no presenta prueba di e pago, e ora e ta admiti cu el a faya cu e Ley di Integridad y e Codigo di Conducta. “Minister Gerlien Croes, como Parlamentario, mi no ta persigui y mucho menos pidi un fabor, mi ta simplemente exigi pa e ley wordo respeta. Pueblo merece transparencia, no excusa,” Vrolijk a termina bisando.
