ORANJESTAD (AAN) – Minister di Transporte, Comunicacion y Sector Primario Chris Romero, a hiba palabra durante e conferencia di prensa yama pa SETAR NV,
relaciona cu e construccion di e teleshop nobo den e area di Palm Beach.
Minister Romero a expresa cu e ta sumamente orguyoso di mira un construccion andando di e Teleshop Palm Beach. “Esaki ta bira e di cinco teleshop cu lo ta na un style nobo y moderno, cu semper SETAR a brinda den e añanan andando. E renovacion aki ta refleha, eigenlijk, inversionnan suntuoso, pero tambe innovacion continuo di nos compania estatal SETAR unda por wak continuamente cu e ta inverti den telecomunicacion, pero tambe den su infrastructura. E ta un inversion grandi, pero e ta necesario. E ta contribui, enormemente, na cuponan di trabao pero tambe e ta aporta na nos economia, cual ta sumamente importante na e momentonan aki, unda nos a conoce un crisis sin precedente. Como Gobierno di Aruba, sigur nos ta encurasha nos companianan pero tambe nos ta sostene e iniciativanan aki y sigui inverti den nos desaroyo pa asina hunto nos progresa” e dignatario a expresa.
Minister Chris Romero a acentua cu SETAR ta un ehemplo di un compania innovativo, dinamico, y cu nunca ta para keto, sino e ta sigui inverti den su infrastructura, su desaroyonan y sigur pa brinda su clientela un servicio cu por competi cu cualkier compania na mundo.
“Mi ta gradici SETAR, pa kere den e necesidad di inversion, hasta awo cu nos ta pasando den temponan dificil, y asina ofrece e bario di Palm Beach un teleshop completamente renova, unda por brinda servicio na e clientela aki, den e region, pero tambe na e turistanan cu ta anda aki banda. Sigur esaki ta un proyecto cu lo beneficia un y tur”, Minister Chris Romero a subraya.
