ORANJESTAD (AAN): Parlamentario Mike de Meza durante un conferencia di prensa, a indica cu tur dia pueblo por mira cu tur dia pueblo ta testigo di e maneho desastrozo di Gobierno.
E ta bisa cu Gobierno actual no tin autoridad moral mas, no tin confianza ni na Aruba, ni na Hulanda pa cu e maneho di Prome Ministro. De Meza ta bisa cu e maneho di e lider di Gobierno ta basa riba engaño tras di engaño.
Parlamentario de Meza a indica cu e Gobierno aki no tin vision, y no por ofrece un perspectiva pa pueblo di Aruba.
Diadomingo anochi a tende e Discurso Nacional, pero e ta hay’e un rueda di prensa politico di Prome Ministro. Pasobra e tabata un discurso bashi, basa riba gañamento, cu ningun perspectiva pa pueblo y comercio, y nada tocante diversificacion di economia, y creamento di cupo di trabao.
De Meza a bisa esey, pasobra a tende papia di 4 pa 5 punto, y ora e haci comosifuera cu ta un gran trabao nan a haci, e unico cu nan a haci ta causa un desastre pa pueblo.
E Parlamentario a admiti cu berdad tin unr ecuperacion den economia danki na turismo, pero esey ta danki na loke Gobierno di AVP a crea y laga atras pa pueblo di Aruba, e.o. e creacion di ATA cu awe nos mester ta orguyoso di dje, y cu tin inversion grandi hinca den turismo. Tambe si mira e infrastructura cu a wordo crea y renoba door di Gobierno di AVP. Pesey awe por ta orguyoso di dje, pasobra e por carga un recuperacion rapido pa turismo.
Tambe a corda e incentivonan di 2009 pa 2013 cu Gabinete Eman a haci pa e hotelnan, duna incentivo pa asina comercio por a inverti y crea cupo di trabao y haci Aruba mas atractivo.
De Meza a haya cu ta un locura di bay acusa e compania Canadian Bank Note di a bay mas cu 100 miyon Florin for di Lotto desde 2011 pa 2021. Gobierno actual no por demostra hamas cu e suma ey a bay pa e compania Canades.
Parlamentario a splica cu Canadian Bank Note como partner di Lotto pa Deporte, semper desde 1999 a cobra 8.25% cu ta forma parti di su entrada pa cu e uso di nan tecnologia y experticio pa yuda e wega di Lotto. De Meza ta insisti cu na 2011, e cifra di 8.25% aki no a cambia tampoco.
El a bisa cu ora AVP a bin na poder na 2009, a bin haya Lotto den situacion desastrozo cu debenan grandi di riba 30 miyon Florin. Anto un Lotto cu hamas tabatin debe. E situacion penoso aki a empeora ora cu ningun banco local no kier a yuda re-financia e problemanan aki di Lotto. Gobierno di AVP tampoco no por a haya placa pa yuda Lotto.
Pero ta e partner di Canadian Bank Note a ‘step up to the plate’ y duna Lotto di Aruba un man y a yega na acuerdo. E compania Canades a busca y haya refinanciamento pa Lotto Aruba, y e compania tambe a percura pa introduci un maneho strategico pa Lotto pa Deporte. Den e gastonan, tin un 15.25% cu ta e “operation cost” cu ta pa paga salario, mercadeo, autonan di Lotto, combustible, etc. Esey ta e 15.25%. Nada mas.
E ta haya cu Prome Ministro no ta corecto di bisa cu Canadian Bank Note a bay cu 23.5% pa Canada bek, e ta un engaño flagrante. No ta bunita di bisa esey di un compania cu desde 1999 a yega y para, sostene, y yuda Lotto di Aruba.
De Meza ta reta Ministronan pa presenta cu cualkier prueba cu 100 miyon Florin a sali bay pa Canada.
