Parlamentario Marco Berlis (MEP):
ORANJESTAD (AAN): Dialuna 13 di Mei 2024 tabata tin e reunion publico den Parlamento tratando e ley di Kiesverordening. E ley cu a wordo introduci pa gobierno a wordo presenta na Parlamento y tabata contene algun cambio riba e ley existente.
Cambionan di e ley di Kiesverordening
E cambionan introduci pa e ley nobo tabata pa asegura e privacidad di nos ciudadanonan durante eleccionnan den futuro. Aruba, manera tur otro nacion den exterior mester cumpli cu tratadonan internacional cu ta asegura privacidad y seguridad di nos ciudadanonan. Data personal cu ta publico, por cay den mal man y facilmente por wordo malusa. E otro cambio den e ley tin di haci cu procesonan di ICT.
Miguel Mansur a presenta tres amienda.
Miguel Mansur a presenta 3 amienda cu e tabata kier a usa pa cambia e ley di Kiesverordening;
- Amienda 1: Personanan cu mas voto riba listanan politico ta bira parlamentario.
- Amienda 2: Bin cu un pre-eleccion pa wak si partidonan chikito ta clasifica pa eleccion.
- Amienda 3: Baha drempel di restzetels. Esaki pa partido chikito haya mas.
Sinembargo por a nota cu Miguel Mansur no a pidi niun parlamentario pa sostene e amiendanan aki y a entrega esakinan cu un firma so. Sinembargo, Reglement van Orde ta exigi pa cada amienda mester wordo sosteni pa un minimo di tres parlamentario pa e por wordo trata den Parlamento.
Tur tres amienda di Mansur rechasa pa tur 20 parlamentario
Ora cu e Presidente di Parlamento sr.Edgard Vrolijk a tuma nota di esaki, el a hala atencion di sr.Mansur y miembronan di parlamento. Presidente di Staten a puntra den sala si tin algun miembro di parlamento cu lo desea di sostene y firma e amiendanan di Mansur. Na final mester bisa cu ni un parlamentario kier a sostene Mansur su amiendanan, cual sigur a pone Miguel su fuse bula. No ta conoci pakico oposicion den bancarota no a sostene e amiendanan ya cu niun di nan kier a vocifera nan opinion.
Controversial: Mansur no a busca conseho di Raad van Advies pa su cambionan di ley
Ademas Mansur no por a presenta un conseho di Raad van Advies riba su cambionan di ley. Mansur kier a simplemente bulldoze e cambionan, mientras e mes semper ta exigi tur tipo di conseho ora gobierno ta presenta leynan den Parlamento. Esaki sigur ta parti di un proceso di ley ora e cambio ta grandi.
Miguel Mansur manera custumber ta resorta na insulto y ofensa.
Den segunda tanda Miguel Mansur ta sali cu su racha di ofensa di custumber na tur 20 parlamentario cu a laga su amiendanan cay. Ta bon pa menciona cu dos di “su” amiendanan
tabata ideanan cu e la copia di Raiz, cu cual e no a ni consulta obviamente, y kier a pasa dilanti nan nanishi pa gana popularidad y voto. Mansur no solamente a demostra di ta instabiel pero tambe inconfiabel, ya cu e ta traiciona esnan cu ta traha cu ne. Ta pesey mes niun di e otro binti parlamentarionan a sostene Mansur den su actitud y proposicion inapropia, sin conseho di Raad van Advies y a rechasa su amiendanan.
