Ursell Arends: Lider di Partido RAIZ
ORANJESTAD (AAN) -- Señor Ursell Arends, cu manera ta conoci ta ex-Minister (entre otro) encarga cu Adulto mayor, y a lanta e Ministerio di Asuntonan di Adulto Mayor, a relata lo siguiente, pa Matutino DIARIO, relaciona cu e Dia Mundial di Adulto Mayor, celebra dia 1 di October 2025.
“Awe riba dia di Adulto Mayor mi lo kier para keto un rato y reflexiona riba un tema cu a bin ta capta hopi atencion durante e ultimo dianan. Pa tristo cu e informacion ta, esaki ta keda e realidad riba nos isla.
E articulo di NOS “Crisis in ouderenzorg Aruba, families durven nauwelijks te praten”, ta revela locual nos como comunidad sa caba. No ta e prome y no lo ta e ultimo si sigui pone e Adulto Mayor un banda.
Como minister saliente pa asuntonan di Adulto Mayor, nos a laga un plan pa largo plazo cu a haya e nomber di ‘Delta Plan’ den un tayo di plata, pa e actual Minister di Ouderen Zorg. Hunto cu e vision aki a laga diferente rapport pa e minister actual por ehecuta inmediatamente.
Tuma nota pa wak con e nomber a cambia di ‘Ouderen Zaken’ pa ‘Ouderen Zorg’. Esaki ta comosifuera cu e Adulto Mayor ta solamente un ciudadano cu mester di cuido so y no un ser humano cu merece di biba un bida digno.
Ta parce cu bienestar di e Adulto Mayor no ta forma parti di e maneho di e gabinete AVP-Futuro. Mientras nos promer minister ta papia di ‘E Bon Comun’.
“Pa capricho politico ta mustra cu ta laga e ‘Delta Plan’ un banda. Esaki ta vision pa e Adulto Mayor cu a wordo prepara y carga pa diferente stakeholders y expertonan local y di Hulanda manera Profesor Anne-Mei The y Lia de Jong e ultimo dos añanan”, Ursell Arends a señala.
El a trece dilanti tambe cu pa prome biaha Aruba a organiza un Foro Nacional pa Adulto Mayor, unda nan BOS a resona y unda finalmente a pone un plan pa largo plazo, hunto pa awe scucha e bos di gabinete AVP-Futuro, Parlamentario Goeloe, cu tambe a forma parti di henter e proceso di preparacion di e Vision nobo aki, ta anuncia e plan di Gabinete AVP-Futuro cu ta parce di ta un “pleister” ariba un herida.
“Mientras tanto ta laga un maneho duradero colecta stof den lachi di e minister. Of ami ta fout? Si un hende sa…lagami sa.
Accionnan urgente pa un cuido di Adulto Mayor sostenibel na Aruba ta necesario, no awe sino ayera!
“Pa enfrenta e aumento di demanda pa cuido di Adulto Mayor y pa evita presion financiero serio, cu esaki ta trece cune, Aruba mester enfoca riba tres accion principal for di e rapport di AAG:
- Introduccion di un Volksverzekering Langdurige Zorg (VLZ), un fondo di seguro special pa cuido di largo plazo, pa garantiza cobertura sostenibel pa tur hende grandi.
- Introduccion di maneho adicional – inclui contribucion propio (eigen bijdrage), cuido preventivo y redirigi accion pa cuido extramural pa reduci gasto den institucion.
- Inversion grandi di transicion – inclui renovacion y construccion di facilidad, implementacion di tecnologia moderno, y formacion y educacion di personal di cuido.
CONCLUSION: Si no implementa e tres accionnan principal aki, e sistema di cuido na Aruba no lo por atende cu e necesidadnan di e Adulto Mayor manera nos ta lesa den e articulo aki.
“Hacie awo, pa nos grandinan. Hacie awo, pa Aruba”, señor Ursell Arends, Lider di Partido RAIZ y pionero den e desaroyo Ministerio pa Asuntonan di Adulto Mayor, a expresa.
