Di 10 am te 9 pm y atardi tin Duro y Tsunami
ORANJESTAD (AAN): Secretario General di partido MEP ta recapitula un evento grandi cu partido MEP ta preparando pa celebra Dia di Betico 25 di januari venidero den combinacion cu 40 aña di Status Aparte.
Evento lo ta henter dia di 10:00 am te cu 9:00 pm. Lo inicia cu un Santo Sacrificio di Misa na Santa Cruz pa 8:00 am, y posteriormente pa 9:30 am lo pone flor na Statua di Betico Croes na Santa Cruz hunto cu Fundacion Betico Croes.
E celebracion lo ta henter dia iniciando desde 10:00 am na sede di MEP cu e tradicional koffiemorgen unda lo ta regalando bolo manera custumber. Ambiente di cah’i orgel di Rodney “Pachi” Werleman. DJ Alvin tambe lo tey pa pone ambiente.
Mesun orario di 10:00 am te cu 1:00 pm, lo tin un torneo di mini futbol di edad 6-8 aña. For di 2:00 pm te cu 5:00 pm lo tin un torneo di domino mientras henter dia parti paden tin un exposicion audio visual unda por mira videonan di Betico y su lucha y logro di Status Aparte-Nel y Evelyn, e 3 lidernan di MEP en conexion cu 55 aña di MEP.
For di 2:00 pm te cu 5:00 pm, riba escenario grandi lo tin un programa cultural. Di 6:00 pa 7:00 pm e banda Duro lo pone ambiente. MEP lo bay over 7:00 pm pa saca e ganador(nan) di e prome y segundo premio di su rifa esta 10.000 y 5.000 Florin cash. Alavez lo saca 10 doorprize y pa e doorprize e persona mester ta presente pa busca esaki mesora. Di 7:30 pm pa 9:00 pm, Tsunami lo ta den cas pa sera e actividad y celebracion.
Tentnan di cuminda: Dilanti sede di MEP lo cera e caminda y ta instala un total di 16 tent di entre otro bende cuminda, bende mata, bebida, artesania pa nombra algun. Despues di a reuni cu tur esnan cu lo ofrece nan cuminda y productonan diasabra ultimo nos a keda sorprendi cu e cantidad di variedad. Lo bay tin entre otro Mama Lina, Donnas Kitchen, Lilas Cuisine, Doris, Maureen y Mauchis pa nombra algun.
Por a tuma nota di e menunan hopi amplio: Aros con pollo, cabrito stoba, oxtail cu funchi, aros moro, concomber stoba, galiña stoba, Barbecue, Johnny cake, bacalao, sanger yena, chicharon cu patacon, arepa di maishi, carne asada, pan cu calco, chuculati pinda, cocada, pastechi, croquette, popcorns, pizza, nacho cu cheeze, postrenan venezolano, hot dog stand, 5 diferente sopi, snackbox, juice di tamarijn y mucho mas. Banda di e cuminda nan dushi tin tent cu lo bende mata, artesania y asina por sigui. Pues Pueblo di Aruba reserva dia 25 di januari pa asina pasa Celebra Dia di Betico den grandi cu nos. Danki Betico!
