Parlamentario Sonaly Fernandez-Acosta (AVP):
ORANJESTAD (AAN): Parlamentario di AVP, Sonaly Fernandez - Acosta ta comparti con importante ta pa cumpli cu promesanan. Y pesey mes ta expresa di ta orguyoso cu den 1 luna di gobernacion Gabinete Avp- Futuro ta cumpli cu aumento di 250 florin, reparatietoeslag pa nos pensionadonan hunto cu e bon noticia cu tur asegurado lo haya nan remedinan bek.
Esaki no solamente ta trece alivio pa un gran parti di nos comunidad, pero tambe positivismo y confiansa den nos gobernantenan cu tin como meta principal e bienestar general pa nos hendenan na Aruba.
Otro punto cu sigur tambe ta importante y ta trece speransa ya cu e tin tur confiansa cu elo bai bin ta e gehandicaptenuitkering cu sigur lo ta un ayudo grandi pa hopi famia den nos comunidad cu ta enfrenta hopi reto y gastonan cu un yui of familiar cu limitacion ta trece cune. Su lema principal cu cada ciudadano merece oportunidad igual ta sigui intacto! Ciudadano cu of sin limitacion, tur merece tin miho calidad di bida, esey ta locual e ta para pe.
Manera por wak tin diferente topiconan y retonan pa cu nos pais cual tur merece debido atencion. Awe Sra. Fernandez Acosta kier pone enfasis riba e sector Social cu ta un sector importante unda cu lo mester bay eleva e maneho social cu tin impacto riba diferente aspecto den nos bida.
E sector social ta dificil pa midi, paso e NO ta un sector cu ta genera, nos no por midi den material con e sector ta funciona. Locual si nos por midi ta e calidad di bida di nos comunidad, mas en particular nos por midi na momento cu nos NO tin casonan devastador cu ta impacta nos hendenan. E ta realisa y reconoce desaroyonan cu a tuma lugar e ultimo añanan, nos tin institucionnan y departamentonan capacita cu ta traha cu dedicacion, personal capacita cu amor y pasenshi pa nan trabou.
A pesar di e esfuersonan aki cifranan ta mustra nos problema social ta grandi. Den combersacion cu diferente persona of instancianan den comunidad, tur ta duna indicacion cu lo mester trese cambio y mehoracion.
Mester fortifica nos base social cu ta e fundeshi pa tur otro sector. Sin siguridad social no tin educacion, un mucha cu no a desayuna bon no por funciona debidamente na scol of un mucha cu situacion instabiel na cas no lo por duna e mihor di su mes den klas. Esaki ta conta pa e maestro tambe! Di mesun forma, sin sosten social no tin mercado laboral duradero y asina por sigui menciona consecuencianan di un sector social deficiente.
Ta hopi importante pa no warda te ora un persona cay, pa e por ricibi ayudo. Nos mester enfoca riba e parti aki pa por preveni e problema. Mester inverti den educacion, prevencion, conscientisacion, capacitacion y participacion comunitario, entre otro aspecto.
Puntonan di accion:
Delinea tareanan di Gobierno y identifica tareanan cu por wordo delega na instancianan no gubernamental, pa fomenta un mihor coordinacion y sinergia.
Control y supervision pa midi resultado y efectividad di polisa y maneho.
Mihor colaboracion , cooperacion entre sector publico y sector priva. Trahando hunto cu mesun enfoke pasobra e meta ta beneficioso pa ambos.
Sector Social ta keda e parlamentario su motivacion pa forma parti di arena politico. E ta di opinion cu nos mester no solamente papia bunita pero tuma accion tambe!
Pues e ta finalisa pa bisa cu e lo sigui Minister di Asuntonan Social hopi di cerca pa por analisa , identifica y trece solucion na e diferente problematica den e sector aki.
