ORANJESTAD (AAN) Lider di Plataforma Nos Pais, Otmar Oduber, a sigui bisa den su conferencia di prensa relaciona cu e Rapport STAB,
cu no ta e ta bisa cu e manera con e kimamento di sushi tabata tuma lugar ta un berguenza, sino cu ta e rapport traha pidi pa e Hueznan y cu aworaki ta den Corte, ta relata.
Oduber a expresa cu podise aworaki e miembronan di Parlamento lo sa hopi di dje. El a reitera cu esaki ta e cosnan di cual mester papia.
“Cu pais Aruba for di cinco aña pasa cu e Ley di Serlimar a keda den Parlamento drumi te awe, wardando pa vota so riba dje den un di dos ronda, caminda cu uno: e ley aki ta pone cu Serlimar ta para riba su propio pia, cu gobierno no mester hinca 27 miyon mas den e compania, pasobra e pueblo di Aruba tin cu bay paga mescos cu na Curacao, na Bonaire, Colombia, Venezuela, Merca, Hulanda, tur parti di mundo desaroya. 2: E ley ta regla tambe den dje cu e compania ta bay dedica, tur loke ta desperdicio di sushi den un procesamento cu ta mas corecto pa e pais aki”, Otmar Oduber a señala.
El a sigui bisa cu e manera con nos ta sushando nos pais, yenando cu sushi e caminda, y unda rapportnan di PAHO tabata mustra con salubridad di nos pais tabata na peligro. “At’e carta. Nada ta keda scondi. Firma di señor Ursell Arends, Minister di Integridad, cu e tempo ey kier a bay bek y a duna permiso, pa bay cuminza un proceso riba e rapport traha pa expertonan, cu ta sali awe bisa cu nan no kier ni papia riba dje, pasobra e ta un berguenza loke tabata tuma lugar na un forma insolito cu e ‘open burnernan’ aki, unda cu miyones di pueblo a costa. Mi tabata minister e tempo ey y mi a para e contract aki, pasobra e tabata paga e compania 1.7 miyon florin den cinco aña”, Otmar Oduber a splica.
El a agrega cu Minister Arends, un par di luna pasa, a duna DOW ok, pa bay bek eynan. Pasobra e kier a boicotea e incinerator, cu tur hende ta gaba y ta di acuerdo cu ne.
Awo den campaña: Aki Otmar a agrega: “Kico mi kier bisa awe? E maneho aki, mientras nos ta papiando cu ta bay eleccion, cu tur hende, naturalmente, ta bay cuminza atrobe cu nan campaña, puntra bo mes: cuanto di e partidonan aki, partidonan grandi den oposicion: hopi aña Partido AVP, partidonan nobo, esnan cu ta considera nan mes cu nan a bin pa cambia politica pasobra politica bieu no ta bon, segun nan. RAIZ tabata bieu?
Segun mi RAIZ ta un nobo nobo, toch? Nobis, nobis mi ta bisa, saca di e paki, anto kico ta e logronan den Parlamento? Cu nan a nombra famianan! Nombra dos ruman den Parlamento. Nan ta mas bieu cu bieunan, anto dos minister. Anto dos minister den gobierno di e Partido nobo RAIZ, generacion nobo. Puntra bo mes, kico a bay bon anto, pa loke ta trata e cartera si señor Ursell Arends, y puntra bo mes kico a sosode cu e economia di Pais Aruba, durante tres aña?” Otmar Oduber a remarca.
