Parlamentario John Hart di AVP:
- Mester adapta e Landverordening Wegverkeer
ORANJESTAD (AAN): Parlamentario John Hart ta duna merito na maneho di husticia den e ultimo dianan, caminda por mira un presencia mas intensivo di cuerpo policial como parti di e refuerzo di control riba regla di trafico. E presencia visibel di polis ta contribui na mas ordo, prevencion y un mayor sentimento di siguridad riba caminda. Sin embargo, segun Hart, control so no ta suficiente pa enfrenta e problema serio di accidente di trafico, specialmente den caso di hit and run.
“Control, conscientisacion y un ley mas fuerte mester bay hunto pa manda un mensahe cla: hit and run no ta aceptabel riba Aruba y lo ta castig’e duro. Parlamento tin un rol importante y tin cu asumi su rol den esaki. Nos mester mas cu solamente multa y control,” segun Hart.
Un cambio di comportacion colectivo den trafico ta rekeri conscientisacion pa fortalece mas e sentido di responsabilidad y norma den trafico.
P’esey ta necesario pa adapta e Landsverordening Wegverkeer (LWV). “Durante nos prome vragenuur di 2026 den Parlamento cu fraccion di AVP a yama, minister di husticia a elabora tambe riba e Landsverordening Wegverkeer y cu un comision lo bin cu diferente recomendacion den cuadro di mehoracion di siguridad di trafico. Esun principal cu ta resalta ta cu mester bay aumenta e castigo pa accident den trafico,” Parlamentario Hart a splica.
Den practica ta resulta cu e castigonan actual pa hit and run no ta suficiente severo pa preveni e tipo di conducta aki. Ta un echo cu Aruba tin hopi auto riba caminda, cu e fluho di trafico diario ta hopi halto y tambe cu e comportacion di automobilistanan, teniendo na cuenta e diferente accidentnan den trafico, mester di un cambio di direccion. Parlamento di Aruba tin un rol pa asumi aki.
Hart ta kere cu un cambio urgente di e Landsverordening Wegverkeer ta na su lugar pa subi considerablemente e castigo pa bandona luga di accidente. Esaki mester inclui aumento di castigo di prizon, prohibicion mas largo pa maneho y multa mas pisa, specialmente ora tin lesion serio of fayecimento.
Parlamentario Hart a solicita un reunion den comision di husticia cu Directie Wetgeving Juridische Zaken pa asina atende e topico di wetgeving en general y lo enfoca riba e Landsverordening Wegverkeer en specifico.
“Siguridad den trafico ta un responsabilidad comparti, cada persona; di un automolista cu mester ta consciente cu e no por bebe y conduci, pa cu cuerpo policial cu tin cu aumenta control di nos trafico, pero tambe un parlamento cu tin cu habri e debate si leynan actual ta manda e señal debido. Tur esaki ta forma parti di responsabilidad comparti pa asina por mehora siguridad den trafico,” Hart a declara.
