ORANJESTAD(AAN)—
Na 2018 DIARIO a bati alarma grandi. Rapportnan y resultadonan di investigacion di e periodo di gobernacion di Mike Eman, a cuminsa cay den man di DIARIO, cu
a start un investigacion cu te awe ta continua.
Uno di e puntonan principal di investigacion di DIARIO tabata, e acuerdo cu Citgo, e refineria cu segun rapportnan mester a habri su porta na 2018 y mester a percura pa un crecemento economico di 15 porciento, cu ta algo sumamente dificil pa alcansa.
DIARIO, a base di loke nos leynan ta exigi, a bay tras di cortina di e acuerdo di Citgo y a investiga diferemte factor.
Na prome luga e posibilidad pa e compania Citgo, cu Nicolas Maduro a uza como su baca di lechi y tabata completamente mara na deba, pone placa pa e proyecto riba mesa. Tur investigacion internacional cu DIARIO a haci, a duna un resultado. Ni Citgo ni PDVSA ni Nicolas Maduro por a realisa e acuerdo.
Na Augustus 2018, DIARIO a publica cu e proyecto Citgo tabata un fantasia, un aventura cu lo a stroba Aruba sigui traha riba su futuro cu tabata sumamente scur debi na e crisis financiero y economico cu refleho social, cu gobierno Mike Eman a laga atras.
Mike Eman mes nunca tabata presente pa a defende su mes di e loke mester a bini y pa Pueblo a keda pinta como un angelito cu un curason di oro, pero cu a logra destrui Aruba cu un traicion manera hopi tempo Aruba no a conoce.
Mientrastanto DIARIO a sigui presenta prueba cu Citgo tabata un fantasia, mientras autoridad internacional tabata busca integrantenan di Citgo cu Gobierno Mike Eman a presenta como realisado di e proyecto sin splica Pueblo cu ta personanan den problema nan a pone na mesa di negociacion di Aruba.
DIARIO tabata tin sigur cu situacionnan serio tabata sconde tras di Citgo y e proyecto refineria, cu a keda un misterio pa Aruba pasobra na forma historico Gobierno Mike Eman a kibra ley pa tene contenido di e acuerdo scondi pa Parlamento, mientras rapportnan oficial tabata indica cu Mike Eman no a sigui e caminda legal di Ley, manera DIARIO a proba.
Mientras paso a paso DIARIO lo presenta Aruba e rapport cu a bay awor Parlamento cu lo conoce e berdad di loke tabata tin scondi den Refineria di Aruba, mester para keto na un asunto cu na diferente momento DIARIO a splica y cu awor e instancianan mas halto na Hulanda ta trece dilanti.
Den fin di siman topico na Hulanda tabata un informacion cu a wordo presenta door di instancianan oficial Hulandes, Raad van State, e Ombudsman Nacional y Algemene Rekenkamer di Hulanda.
Den cuadro di formacion di un gobierno nobo na Hulanda, nan kier papia di e confiansa cu Pueblo mester tin den gobernacion, cu mester uza idioma mas facil, cu tambe ta un trampa den nos leynan cu demasiado bes den un situacion democratico, Pueblo no por comprende.
Segun e instancianan Hulandes, Pueblo mester comprende reglanan y loke keda presenta dor di gobernacion pa asina por tin confiansa den loke ta pasa.
Den investigacionnan di Gobierno Mike Eman a base di tur e rapportnan oficial cu a mira luz, DIARIO a base di conocemento y asistencia profesional caminda ta necesario, a mustra con Gobierno Mike Eman tabata experto den manipulacion cu supuesto sabiduria, mientras tabata trapa riba leynan di Aruba y goberna contra leynan di Aruba.
DIARIO semper a splica cu ta pa motibo di e idioma supuestamente sabi cu Mike Eman tabata uza, hendenan cu no por a comprende kico e tabata papia a permito Mike Eman destrui entrada di Aruba cu mita BBO (e mes a admiti cu e no por a sigui deshaci di BBO), destrui Aruba cu 1.6 Miljard pa cantidad di contracto di Bo Aruba y destrui Aruba cu e debe nacional pasobra e no tabata tin placa pa paga e gobernacion caro cu el a hiba manera Sjeik.
Awe DIARIO ta haya rason. Awe DIARIO ta entrega Aruba prueba di loke a pasa cu e confiansa cu Pueblo a pone den Mike Eman, e destructor di Aruba.
Awe cu un curason trankil DIARIO ta pidi Pueblo di Aruba huzga, awor cu tur carta ta riba mesa y e cara di un angelito ta disparse pa e cara tapa di Mike Eman, cu mester a bay sconde, por wordo desenmascara dilanti Pueblo ora Husticia dicidi riba e rapport di Refineria di Aruba!
