Miguel Mansur di Accion21 - Ban analisa e gobierno actual su maneho economico durante e periodo prome cu Covid-19.
Pa ta husto mi ta bay enfoka unicamente ariba e prome dos añanan di gobernacion, osea 2017-2019. MEP su lema di campaña ta, hunto nos ta avansa, pero esey no ta loke pueblo a biba bao di Gabinete Wever-Croes.
E realidad tu cu hunto nos a bay atras. Crecimento economico real a baha entre 2017 y 2018. Ela bolbe baha entre 2018 y 2019 y asina el a sigui. Gabinete Wever Croes a reduci crecimento economico tur aña cu nan a sinta, di prome cu pandemia caba.
Awor si nos analisa gastonan di gobierno, entre 2017 y 2018 a reduci gasto cu 6.1 miyon segun cifranan di Banco Central di Aruba. Pero entre 2018 y 2019 nan a hisa gasto di gobierno 63.9 miyon florin hibando gastonan na e nivel mas halto den nos historia prome cu pandemia. Gobierno actual a gasta un total di 1,389.5 biyon florin na 2019, un record pa gastamento di placa di pueblo. Na 2019 nan a logra un surplus di 12.9 miyon florin. Si nos suma e surplus di 12.9 y e reduccion den gasto di 6.1 miyon na 2017 nos ta yega na e suma di 19 miyon florin. Esey ta keda chikito banda di e 63.9 cu nan a aumenta den gasto na 2018. Prome cu pandemia caba Gabinete Wever-Croes a sigui e trayecto di empobrece nos pais cu a cuminsa na 2001.
Nan aporte negativo pa nos finansas publico tabata casi 45 miyon florin den e prome dos añanan.
Sra. Wever-Croes ta gusta gaba cu nan si sa negocia cu Hulanda. E realidad ta cu durante e cinco lunanan cu ela tarda pa firma e Landspakket, Aruba mester a emiP bono pa cubri su necesidadnan financiero.
E gasto di interes liga na e bononan lo costa pais Aruba 80 miyon. Esey ta igual na tur e placa cu Aruba lo a spaar door di dos aña di prestamo na 0% di Hulanda pa e pagonan cu madre patria a asumi.
Gasta dos aña di spaarmento den cinco luna, tirando 80 miyon afor plus e casi 45 miyon cu nan a hinca pais Aruba den cora durante e prome dos añanan ta un perdida di casi 125 miyon pa caha di pueblo.
Dia 25 di juni vota consciente, vota pa para e mal maneho di pueblo su placa.
