ORANJESTAD(AAN)- E inhusticia mas grandi cu Mike Eman por a comete den bida, ta contra su mes. Mike a pasa un bida ta trata na destrui su propio
personalidad y realidad, pa asina cumpra curason di Pueblo pa e por ta hoimber cu ta manda.
Mike ta distingui su mes riba e lista di gobernante di Aruba, pa algo cu tur hende ta nota. Ora Mike no logra loke e kier, ora e no alcansa su meta, e ta cuminsa yora.
Awa ta drenta wowo di Mike na momentonan cu e mester contene su mes y mira kico e ta haci.
Ora awa drenta wowo di un lider, e por ta algo masha bunita si e ta carga un sentimento. Pero un lider sa con e ta lucha cu su lagrima cu e no ta uza como propaganda.
Yora pa Mike ta un propaganda, mescos cu e forma cu e ta perde cabes y haci su mes ridiculo.
No tin nada mas ridiculo cu loke Mike a haci como Prome Ministro di Aruba, ora e mester a enfrenta Hulanda, acepta cu el a hiba un mal maneho y yega na un forma elegante na un areglo cu Hulanda pa scapa Aruba for di e abismo den cual el a hinca Hulanda.
Ora Mike mester a enfrenta Hulanda, el a rabia. El a crea su drama cu e ta bay muri di hamber y dianan largo mundo tabata haci bofon di Aruba cu un Prome Ministro cu ta bebe Ensure pa e no enfrenta problema cu e mes a crea.
E suceso aki no ta algo isola. For di momento cu Mike a drenta politica e tabata e “mooie, brave, jongen” manera Hulandes ta bisa.
No tin detaye di creacion di un politico perfecto den bista di votado sentimental, cu Mike no a tene na consideracion.
Ora analisa Mike den e totalidad di politiconan na Aruba, for di su abuelo sigui bini awe, ta nota cu Mike a evita tur eror cu nan a comete.
Cu de bes en cuando e mester a cende un bela pa e por a sigui dilanti, ta algo cu ta mas cu claro.
Mike a haya un oportunidad di oro pa studia y haya experencia riba tereno legal y di notario, cu tabata duna mas forsa pa e atende cu Aruba.
Manera e mes ta mustra hasta su scriptie pa termina su estudio el a dedica na politica, cu tabata manera un fantasma cu tabata persiguie for di momento cu Betico Croes a habri porta pa Aruba bira pais y Mike por a bira sombra den edificio di Gobierno, cu nunca mas el a bandona.
Mike ta un album di historia politico. Ora papia di Mike, ta papia di un figura cu a uni tur elemento cu a faborece of stroba otronan, pa crea un lider sin contenido.
Personalidad di Mike ta bini dilanti den e forma cu el a manipula Pueblo di Aruba cu a bati man pa Mike, mientras Mike a destrui e futuro finaniero di Aruba cu mita BBO, cu tur hende mester por a comprende cu ta un locura.
Mas ainda pasobra ni Parlamento Mike por a entrega cifranan y documentonan concreto, con e pais ta bay sigui sin e placa. Tur hende a bati man ora Mike a haci e prome debe grandi pasobra tabata tin falta di e placa di mita BBO.
Mike no ta lider. Mike ta haci hende pensa riba un mucha cu no kier pa ningun mete ora e ta atende cu su juguetenan cu den caso di Mike ta bienestar di Aruba, placa di Aruba, cu na forma dictatorial el a abusa.
Mike no ta lider, Mike ta mucha maluco cu mester wordo coregi
Mike a crea un imagen publico cu ta culmina ora e cuminsa yora pa asina haya oportunidad pa haci loke e kier haci, aunke mundo caba.
Cu Mike ta un peliger pa Aruba, ta hancra den rapportnan cu ta splica con Mike a trapa riba Parlamento, a pone tur conseho un banda, a haci y deshaci manera e tabata kier mientras e tabata uza brasa y sunchi pa ciega un Pueblo.
Si e ta respeta Pueblo e ta bisa awe, pakico e no a drenta Parlamento ora el a bolbe despues cu el a tuma un decision sin pensa, na 2017, cu e ta bandona politica.
Si na 2018 Mike honestamente a acepta cu el a actua robes y a drenta Parlamento pa yuda splica e desaster cu el a laga atras, awe nos ta papia otro.
Mientrastanto nos no por yama un persona cu no por dirigi ni su mes, lider!
