Parlamentario John Hart na gobierno:
ORANJESTAD (AAN): Un di e retonan grandi na Aruba ta e control di nos leynan existente. Tanto bal si bo tin ley, pero no tin control, segun parlamentario John Hart di AVP a indica na DIARIO.
Hart ta boga pa un mayor control di parti di gobierno. Echo ta cu den e ultimo 8 añanan aki e ley di pensioen general (LAP) no tabata un prioridad pa e gabinete anterior. Si esey tabata e caso, anto lo a institui un instancia pa supervisa e control di e ley aki.
Un ley cu gabinete di AVP a bin cu ne den 2011 tabata e introduccion di pensioen general.
Ambos gobierno di MEP despues no a atende mas cu e control di e ley di pensioen general aki. E ley ta stipula cu dunado di trabao y empleado mester contribui na fondo di pensioen pa trahado por haya un entrada adicional ora e yega su edad di pensioen. Sinembargo, no tin un entidad gubernamental cu ta controla si ta cumpliendo cu esey.
‘Desde 2017 entre otro Sociaal Economische Raad (SER) a señala na Gabinete Wever Croes I, cu no tin un instancia ta controla e cumplimento di e ley di pensioen. Nada a cambia desde 2017 pa awo,’ asina Parlamentario John Hart a indica añadiendo cu e trahado cu ta lanta mainta bay su trabao, traha 8 of, tin biaha, mas ora pa dia, mester tin e siguransa, basa riba e ley LAP, cu na momento cu a yega su edad di pensioen e lo ricibi su pensioen.
Parlamentario Hart ta para pa un mercado laboral balansa y parti di e balans ey ta pa empleadonan tin e garantia di derecho riba pensioen. Pa e motibo aki sr. Hart lo keda pone presion na Gobierno pa asina duna prioridad na control di e ley aki. Diferente pregunta lo worde entrega na minister riba e tema aki.
