ORANJESTAD(AAN)—Na momento cu DIARIO na 2018 a cuminsa cu su investigacionnan riba e proyecto refineria di Gobierno Mike Eman, nos a presenta un aspecto importante.
Despues cu Gobierno Mike Eman, sin autorisacion di antemano di Parlamento manera ley ta rekeri, a mara Aruba na e acuerdo cu Nicolas Maduro pa Citgo, mester a procesa na careda e loke ley ta exigi.
Dia 14 di September 2016, e organo mas halto cu ta conseha gobernacion cu ta Raad van Advies, a contesta e carta di gobierno cu a pidi Gobierno bay di acuerdo cu loke el a firma pero tambe pa introduci Refineria di Aruba.
E compania nobo di Aruba cu lo a haya pues e nomber di Refineria di Aruba, lo tabata encarga cu hur di e terenonan, edificionan y ekipo riba e tereno di refineria. Tambe e lo tabata encarga cu e negoshi cu e tankinan di azeta.
Segun e loke a presenta na Raad van Advies, e placa cu Aruba tabata tin den Valero Marketing and Supply Aruba N.V. lo a wordo hinca den Refineria di Aruba, cu lo a keda pues cu e negoshi di combustibel local tambe.
Pero tabata tin posibilidad cu e accionnan aki cu un balor di 40 Miyon lo a wordo bendi.
Ya cu tabata papia di benta, Raad van Advies a puntra pakico e 40 Miyon a bay Refineria di Aruba y no a bay den caha di Aruba, cu ya den presupuesto nacional a considera e 40 Miyon aki como entrada.
Pa DIARIO e carta di Raad van Advies di September 2016 tabata crucial pa vigila e proyecto Citgo. E 40 Miyon ta mustra con, sin ainda aprobacion di Parlamento, Citgo a bira realidad na e pais cu tabata baila.
Aruba a keda cu Refineria di Aruba, cu tabata directamente mara na e introduccion di refineria den e ambiente politico special di Gabinete Mike Eman, sea cu kier admiti esaki of no.
Importante pa Aruba tabata no solamente e industria, pero e hecho cu FMSA cu a tuma e encargo di Valero y despues Citgco, ta responsabel pa combustibel di cual pueblo di Aruba pero tambe avionnan y barconan ta depende.
Ora Gobierno Wever-Croes a sinta y ya fracaso di Citgo a hinca Aruba den e incertidumbre mas grandi cu Aruba a yega di conoce, a introduci tambe cambio den e Conseho di Comisarionan y a cuminsa pues cu investigacion despues cu hopi informacion no tabata disponibel.
Den e rapport cu awor a mira luz, ta topa cu e informacionnan cu inicialmente a keda scondi pa Gobierno Wever-Croes na un pais, cu ta yama su mes democratico y caminda Pueblo ta vota pa su gobernantenan den Parlamento y Gobierno.
Gobernacion democratico ta encera cu ningun persona cu ta maneha un propiedad di Aruba, por tin un poder mas grandi cu Parlamento of Gobierno.
Awe Refineria di Aruba ta bolbe hiba nos na un asunto cu na varios ocasion DIARIO a trece dilanti.
E companianan di Gobierno a wordo introduci pa deshaci di poder di politica riba asuntonan vital di e pais.
Na Refineria di Aruba, awe un rapport ta mustra con a crea un compania cu mester representa Pueblo di Aruba riba tereno di asunto di petroleo, pero a habri caminda pa loke hamas por pasa na un empresa ni den servicio directo di Gobierno.
For di 2018 DIARIO a pidi pa investigacion di tur loke ta relaciona cu e proyecto di Citgo cu a kibra ley na Aruba pa yega na un acuerdo cu un grupo cu mal reputacion internacional.
Awe e rapport ta conoci na Aruba cu un contenido cu no solamente, segun nos, ta duna basta trabou investigativo na Husticia pero na mes momento ta bolbe exigi pa Aruba defini kico ta un compania di estado, cu realmente no ta ni carni ni pisca, den nos sistema democratico pero tambe empresarial.
