Otmar Oduber, lider di PPA:
ORANJESTAD (AAN) – Como su di dos tema riba agenda, Otmar Oduber, lider di PPA, a toca e tema di su ultimo encuentro tanto cu OPPA, organizacion cu ta representa e pensionadonan na Aruba, como cu SVb y AZV, muy en particular riba loke ta trata nos grandinan.
“Manera ta conoci cerca boso, pa mas of menos un aña nos plataforma a traha riba e materia aki, y a trece un cantidad di informacion den comunidad, cu despues a wordo sostene tambe pa cu rapportnan di tanto CBS como tambe pa Banco Central di Aruba, cu ta mustra cu e cantidad di pensionadonan na Aruba ta hopi grandi, y peor ainda cu den e cantidad grandi aki tin un grupo substancial di mas di 14 mil pensionado cu tin un entrada di menos cu 800 florin, y hopi di nan cu un reduccion cu ta haci esaki mucho menos di e 800 florin aki”, Oduber a remarca.
Otmar Oduber a subraya cu pa tristo cu e por sona, y lamentable cu e por ta, ta e hecho cu 21 miembro di Parlamento di Aruba nunca a para un rato keto, no a presenta un ley, no a busca un solucion, no a yama gobierno aden ni puntr’e riba un hecho cu, no solamente tabata bisto, sino cu tabata documenta door di instancianan local.
“Boso tur, comunidad di Aruba, a mira con OPPA den varios ocasion a sali afo den rueda di prensa, a dirigi mas di dies carta caba, segun mi a compronde, for di su presidente na Gobierno, y lamentablemente, no a logra nada pa nos grandinan, durante e cuater añanan cu a caba di pasa.
“Y mi ta keda ripiti, 21 miembro di Parlamento cu awo ta papia y ta prepara pa bay eleccion, no a presenta ni un plan, un vision, un pensamento, no a reuni cu un instancia aki na Aruba, pa por yega y trece un solucion pa e grupo aki”, Otmar Oduber a vocifera.
El a sigui bisa cu nan Plataforma, y awor via partido PPA, a reuni cu e gruponan aki, nan a presenta solucionnan pa e adultonan mayor, pa e pensionadonan y nan a bisa cu, definitivamente, mester coregi e situacion:
“1. Elimina e impuesto cu ta wordo paga pa nos grandinan.
- Elimina y stop tur sorto di belasting cu ta wordo paga despues cu bo yega edad di pensioen. Esey ta un compromiso cu nos a pone nos dilanti.
- Banda di e hecho cu nos tin cu percura pa nos grandinan haya nan remedinan bek cu tanto nan tin mester di dje, cu lamentablemente pa motibo di falta di vision y perspectiva, cu a kita for di e lista positivo, specificamente, pa nos grandinan na e momentonan aki.
- Percura, naturalmente cu e entrada di nos grandinan wordo aumenta”.
Segun Otmar Oduber, no ta cuestion di cu si por of no por, mester busca e manera di por haci esaki, pasobra no ta husto pa ningun adulto mayor ni ningun pensionado tin cu biba cu e entrada cu nan ta bibando dje, cu gran mayoria di nan ta bibando na e momentonan aki.
