ORANJESTAD (AAN) – Parlamentario Endy Croes, den conferencia di prensa di fraccion di MEP, Dialuna mainta a menciona cu Diabierna mainta tabata tin otro reunion publico di Parlamento,
den cual Minister di Transporte, Comunicacion y Sector Primario Chris Romero, a presenta hunto cu Director di Servicio Postal, y nan tambe a bin pa pidi opinion di Parlamento, tocante lo siguiente:
Ta conoci cu Servicio Postal, Arubus y diferente otro departamento, ta subsidia pa Gobierno cu “x” cantidad di placa, pa por tene nan operacional.
“Nan no ta departamentonan cu ta haci ganashi of ta sostene nan mes. Y di Postkantoor esaki no ta diferente. Normalmente, pa aña, gobierno ta inyecta 3.8 miyon florin den Postkantoor, pa entre otro mantene e operacion aki (salario, etc). Mirando cu e presupuesto 2021 ainda no a pasa, e ora ey mester a bin Parlamento pa pidi su sentimento pa, den cuadro di locual ta presupuesta pa 2021, cu ta e 3.8 miyon, si por adelanta 74% cu ta un suma di 2.8 miyon florin pa mantene Postkantoor operacional y pa paga sueldo y operacionnan, y e suma aki lo percura pa yega te October”, Parlamentario Endy Croes a duna di conoce.
E parlamentario a subraya cu e ta sigur cu dentro di poco e presupuesto lo pasa, y cu esaki ta djis un adelanto den e presupuesto 2021.
El a agrega cu Diabierna mes ora a caba cu e reunion publico di Chris Romero, cu ta dos dia tras di otro cu parlamento ta percura pa nan trabao por continua, Presidente di Staten Andy Thijsen a yama mesora un reunion cu Comision Central, pasobra eyden mester fiha e aprobacion di e “gevoelens” di Staten.
“Mi ta contento cu 11 miembro di fraccion a bay di acuerdo cu esaki. RED, POR y Parlamentario Independiente Dellanire Maduro tabata presente y hunto cu fraccion di MEP ta esnan cu a forma e 11 parlamentario cu a aproba ambos: e peticion di prome minister Evelyn Wever-Croes, cu ta pa e paketenan di alimento y tambe a duna e sentimento positivo pa cu e peticion di Chris Romero pa Postkantoor y asina garantiza salario y operacion di Servicio Postal tambe”, Endy Croes a señala.
E parlamentario ta lamenta cu tanto AVP como Parlamentario Independiente Daphne Lejuez (cu ta representa Accion 21) tabata tey Diahuebs. Pa loke ta Lejuez Diahuebs el a bandona e sala y Diabierna no tabata presente y AVP a bandona e sala, no a bin na e Comision Central ora di duna e sentimento y a duna ausencia na algo asina importante.
“Mi ta lamenta cu pa cuestionnan asina delicado, bo ta hunga cu salario di hende, operacion di full e compania di post, bo ta hunga cu 7.820 famia cu ta depende riba un cuminda, riba e plan cu Sociale Zaken y BRA ta bay tuma over” e parlamentario a expresa.
El a agrega cu enberdad nos ta den porta di eleccion, y e politiconan menciona ta cana cas pa cas, ta pone un truck ekipa pa musica, ta cana den gruponan grandi pa busca sosten di pueblo.
“Un empleado di Postkantoor por duna sosten na AVP, cu a bira lomba pa nan den e momento crucial aki? 7.820 famia, y ora nos papia di famia ta mas di un hende den cas, pues e ayudo pa e famianan aki ta representa casi 20 mil persona: e hendenan aki si nan wordo acerca pa AVP por duna bo confianza?” Parlamentario Endy Croes a señala y a conclui bisando cu e kier a trece esaki dilanti na conocemento di comunidad.
