ORANJESTAD(AAN)- Na hopi ocasion, DIARIO a cuestiona si Nacionnan Uni tin balor. Ora nos mira sucesonan rond mundo y dictadonan cu ta haci bofon di loke tabata motibo di existencia di Nacionnan Uni cu ta paz, nos tin nos
preguntanan grandi.
Pero di otro banda nos mester bisa, cu mundo mester di un foro caminda paisnan ta bini hunto pa papia riba bienestar di hende y yega na tratadonan na bienestar di Pueblo.
Na 2015 Aruba tambe a firma e acuerdo di Nacionnan Uni pa pone fin na miseria y hamber.
Un total di 17 punto a wordo poni riba papel pa paisnan uza como nan base di gobernacion den cual ta pone hende central.
Ora mira atras te na 2017, e pregunta ta surgi unda e hende a keda.
Ta mira tram, ta mira brug, ta mira 1.6 Miljard rementa cartera di Aruba como pais.
Te na momento cu gobierno cambia no ta mira rastro di e Acuerdo cu a firma cu Nacionnan Uni na 2015 y cu no ta inclui tram ni brug pero si loke hende mester pa e biba.
Cu entrada di Gobierno Wever-Croes responsabilidad ta bira e palabra mas importante den gobernacion.
Responsabilidad real cu ta e base di bon gobernacion y cu directamente ta pone e hende central den tur decision y gasto di Gobierno.
Kico responsabilidad di Gobierno ta, ta keda confirma na momento cu Covid-19 presenta riba mapa pa destrui hende y e Acuerdo di Nacionnan Uni, demostra di realmente ta fundeshi pa bienestar di hende.
Ora Covid-19 a plama rond mundo, e forma cu Gobierno realmente a pone hende central, a haya contenido.
E condicionnan bou cual un Pueblo ta biba, a bira determinante pa por combati Covid-19.
E hende mester come pa e por biba. E hende mester di awa limpi pa su higiena y pa e por prepara su caminda.
Hende mester a cuminsa produci mas tanto cu ta posibel su propio cuminda mientras produccion mundial tabata basha abou.
Hende tabata tin mester di electricidad cu e por paga na su cas, cu mester a bira su shelter, cu ta duna refugio ora hende a bira peliger pa otro y no a wordo permiti pa bandona su cas y topa cu otro hende mas manera e tabata kier.
Covid-19 a haci hende y e necesidad di hende central den gobernacion, cu awe mester mustra su responsabilidad a base di e maneho cu Gobierno a tuma.
E fin di siman aki FCCA a invita Prome Ministro Wever-Croes pa bishita shete proyecto di vivienda na diferente parti di Aruba.
Shete proyecto caminda hende como centro di gobernacion, mester biba na un nivel cu por considera digno y adecuado pa hende biba.
Den fin di siman nos a wordo informa con Prome Ministro Wever-Croes a bishita casnan social. Casnan di Arubano, cu a conoce un tarifa mas abou di coriente.
Segun plannan di Gobierno, prijs di awa mester baha. Trabou cu no ta depende di turismo so mester bira realidad den un infrastructura economico nobo.
Pa e sector di agricultura y cria, prijs di awa a baha pa produccion local di cuminda subi y mas hende por gana nan pan di cada dia den sector primario.
Hende central tabata e decision di Nacionnan Uni na 2015 y 17 punto a wordo presenta.
Na final di 2018, Algemene Rekenkamer Aruba a presenta su rapport a base di e forma cu Gobierno Wever-Croes lo a actua a base di su maneho directamente mara na e 17 puntonan, cu a bira esencial ora Covid-19 comberti vivienda pa “shelter” pa proteha bida y a confirma e prioridadnan di Gobierno Wever-Croes, cu awe ta topico di Aruba caminda responsabilidad a bira prioridad di gobernacion na 2020!
