ORANJESTAD (AAN): E miembro di Partido AVP, Clifford Heyliger a splica cu mundo ta pasando door di tempo nan dificil.
Prijs halto di combustible, inflacion for di proportion, reto nan logistico, falta di material y product nan prima y asina mi por menciona varios mas. Tur e tema nan aki ta kita nos atencion di e crisis mas grandi cu Aruba a yega di enfrenta cu ta e Abuso di nos yiu nan.
Segun Heyliger, ta parce cu nos pais a degenera asina hopi cu abuso di mucha ta normal unda ni sociedad ni politico nan ta worry pa atende cun’e. Desde ki dia e bienestar di nos yiu nan a bira secundario? Nos ta grita y bati na pecho cu derecho di mucho ta sagrado y cu derecho di educacion ta un derecho fundamental. Pero e realidad ta cu nos no ta mehorando e seguridad di nos yiu nan y nos ta hortando mucha nan di un educacion pa motibo di airco geld. Nos mester tin berguensa cu esaki ta e situacion na Aruba.
“Nos yiunan ta sufriendo pasobra un monster ta destrui nan bida. Nan ta keda sin personalidad, vulnerable, deprimi, y mas tristo. Cu tur ta nan inocencia y nan “childhood” ta worde horta di nan. Abuso di mucha mester worde categoriza como atentado di morto cu a laga e victima trauma pa bida.
Unda e ley contra abuso di mucha: Segun Heyliger, mas cu 40 miyon Florin extra di presupuesto a bay pa soluciona e crisis social na Aruba. Pero te dia di awe gobierno no por mustra unda e placa bay y kico su efectividad tabata. Prensa na Aruba a laga sa cu nan no ta publica caso nan di problema social of suicidio. E berdad ta cu esey no ta nan tarea. Ta tarea di ministro di asunto social y departamento nan di asunto nan social pa sali y duna cuenta y razon. Comparti datonan cu comunidad y yuda educa comunidad. Specifica e problema social pa asina pueblo por comprende kico ta pasando. Por ehempel:
- Cuanto suicidio of intento di suicidio tin pa luna?
- Cuanto mucho y adulto ta sufri di depresion?
Heyliger a bisa cu e ta kere ta tempo pa Parlamentario nan, e representante nan di pueblo bini hunto y exigi di gobierno accion y transparencia den e tema di Abuso di mucha.
Parlamento di Aruba tin 5 parlamentario cu ta bin di e area social. A bira tempo nan bini hunto y representa pueblo di berdad. Pueblo kier seguridad y proteccion pa su yiu nan. Pueblo kier castigo mas severo pa e criminal nan di mucha. Pueblo kier atencion pa e crisis aki.
Un criatura inocente ta perde bista riba bida pasobra un monster, un sinberguenza ta abusa di dje. E famia tambe ta sufri.
Na su opinion abuso di mucha ta e crimen mas cruel cu un hende por comete contra un otro persona.
Un pregunta ta keda, ki dia nos ta bay den “lock down” y tuma medida mas evero pa evita cu pandemia di Abuso di Mucha ta sigui plama.
