Fraccion di MEP ta asombra cu esaki
- Esaki riba ordo di Prome Ministro
- Preguntanan skerpi haci na Ministro Finansa
ORANJESTAD (AAN): E siman aki, Fraccion di MEP den Parlamento a manda preguntanan por escrito na e Minister di Finanzas tocante e maneho financiero rond e trabao di limpieza cu ta worde haci na e bario-nan di Aruba riba orden di e Minister President Mike Eman.
Segun informacion ricibi, Bureau City Inspector, riba orden di e Ministerio di Asuntonan General y di Naturaleza, no ta worde utiliza solamente pa limpieza di lugarnan publico, sino tambe pa limpia tereno-nan priva, usando fondonan publico. Esaki ta mustra claramente cu e gastonan ta worde haci na beneficio di e campaña electoral di AVP, uzando placa di pueblo.
Ademas, segun informacion cu e Fraccion a haya, e presupuesto di 2025 pa Bureau City Inspector ya ta completamente gasta, mientras cu e aña di presupuesto 2025 ainda tin tres luna pa bay. E fraccion di MEP ta considera esaki sumamente preocupante, y ta pidi transparencia, control y responsabilidat inmediato di parti di gobierno. Ta asina e problemanan di mal maneho a cuminsa durante e prome gobierno di Mike Eman y a termina den un curatela financiero y welga di hamber na aña 2013.
Den e preguntanan na e Minister di Finanzas, e fraccion ta pidi pa tin investigacion y control efectivo, y kier sa si e gastonan aki ta den conformidad cu e Ley di Contabilidad, y ki mecanismo di control ta existi pa preveni uso incorreto di fondonan publico.
“Bon maneho financiero ta un fundamento di bon gobierno. Parlamento y pueblo tin derecho pa sa con e placa di comunidad ta worde usa,” segun e fraccion di MEP.
E fraccion ta spera cu e Minister di Finanzas contesta e preguntanan den dos siman, pa Parlamento por cumpli cu su rol di vigila uso legitimo y integro di fondonan publico.
