ORANJESTAD (AAN): Diahuebs mainta, parlamentario di AVP tabata presente na Pasadia Bibito Pin, pa forma parti di e Open Dag di Stichting voor Verstandelijke Gehandicapten Aruba (SVGA).
E ocasion tabata oportuno, no solamente pa brinda apoyo na tur cliente, nan famia y tambe personal y directiva di e institucion, pero tambe pa recorda cu, mientras tabatin tur oportunidad pa trece mehoracion, segun AVP, ta mira cu Gobiernonan di MEP a ignora e necesidad di e muchanan cu limitacion riba nos isla.
Bao di SVGA ta cay diferente centro di cuido, manera Bibito Pin, Briyo di Solo, Cas Blenchi y Man Na Obra, entre otro. Cada un ta adapta na e necesidad unico di e diferente cliente, garantisando facilidad cu ekipo, personal profesional pa cuido, pero tambe formacion pa desaroyo personal y miho integracion den comunidad. Un trabao sumamente bunita, cu mester apoya, segun e parlamentario a indica.
Partido AVP semper a boga fuertemente pa e segmento aki di nos comunidad. Pesey e partido a entrega na Parlamento di Aruba, dos aña pasa, un concepto di cambio di ley pa ahusta e ley di bijstand. Cu esaki a habri caminda pa otorga e mayor di un muchanan cu limitacion, un bijstand cu por yuda nan cubri e diferente gasto adicional cu tin mara na nan cuido.
Articulo 8A, di e concepto presenta ta bisa cu: Minister por otorga na e cabes di famia cu tin un mucha den cas cu ainda no a cumpli 16 aña, un ‘kindergehandicaptenuitkering’ si ta keda demostra cu e mucha tin algun tipo di limitacion. Fuera di esey, AVP a haci su huiswerk indicando kico e ta representa pa caha di Pais Aruba. Tin rond di 400 famia cu por bin na remarca pa un suma total di 4.6 miyon Florin pa aña.
AVP ta lamenta pasobra nan a entrega e concepto aki dia 3 di september 2021 y no a tende nada mas. A haci diferente pregunta na minister, manda carta di rappel. Despues hasta a entrega un presupuesto alternativo pa cuminsa paga esaki.” Sinembargo Gobierno a haci loke nan ta haci miho, ignora e necesidad di pueblo cu excuus cu ta trahando riba dje.
Mientrastanto, e tres aña aki tabata tempo cu hopi mucha por a haya un ayudo pa contribui na un miho calidad di bida. Pero e egoismo di MEP no a permiti duna AVP un logro, maske esey a bay na sacrificio di e muchanan cu limitacion.
