ORANJESTAD (AAN): Si acaso AVP bay den Gobierno, nan ta sigur cu lo cambia reglanan y asina den 100 dia trece alivio instantaneo pa comunidad.
AVP a indica cu ultimo tempo ta mira cara di hendenan preocupa cu remedinan cu nan no por paga ta riba nos mente continuamente. AZV semper tabata su intencion pa cubri un pakete basico y acceso na bon cuido. Pa AVP, loke gobierno actual a corta den pakete di AZV ta inhusto. Pesey un gobierno di AVP dentro di 100 dia di un gobierno nobo lo pone pakete di remedi completo atrobe.
AVP ta nota cu pueblo ta preocupa ta e manera con e cobertura di AZV a keda bay atras den e ultimo añanan. Mescos cu tur otro reto cu e famia Arubiano ta confronta awendia, AVP ta para banda di e ciudadano cla pa defende su derecho.
No tin duda cu esaki ta momentonan hopi dificil, mas ainda si bo ta sufri di un kebrante di salud.
Mientrastanto sector di cuido medico ta practicamente den crisis, caminda e falta di atencion pa nos ciudadanonan ta sumamente grandi.
Cobertura di tur remedi, warda largo riba afspraak cu specialista y e demotivacion entre e profesionalnan medico, sigur ta entre e puntonan cardinal cu AVP ta comprometi pa atende na momento cu haya e mandato di pueblo pa bolter cos y cuminsa dirigi e pais den un rumbo mas prospero.
AVP a mustra cu nan lo haci e pakete di remedi completo atrobe pa asina persona cu ta sufri di dolor, cu a caba di haya un tratamento den eerste hulp, a bay dentista, etc. haya e remedi esencial pa dolor, cubri back for di AZV. Mescos cu remedi pa alergia y cu ta proteha stoma di otro tratamento, etc.
Con AVP lo haci esaki, segun nan ta masha simpel, mester bay back na e esencia di pakico a crea AZV, esta di brinda acceso na e miho cuido posibel pa medio di e miho dokter, specialista, hospital, enfermero, pero tambe e remedinan cu nos hendenan mester.
