Wendrick Cicilia:
ORANJESTAD (AAN): Deporte tin un balor importante pa nos comunidad, p’esey mes ta tristo pa mira cu no tin atencion ni vision pa deporte. Falta inversion, mantencion y vision pa deporte na Aruba. Esey ta e posicion cu Wendrick Cicilia, den representacion di Partido AVP a expresa relaciona cu e desaroyonan lamentable di e siman.
E impacto di e organizacionnan deportivo riba nos hubentud y nos barionan ta positivo. Mas cu e beneficio fisico, e beneficionan emocional pa hobennan cu ta practica deporte na un manera organiza, serio y structural, ta hopi. Esaki ta fortifica e sentido di cohesion social den bario, ta duna perspectiva y ta kita atencion di nos hubentud riba cosnan negativo manera (droga, alcohol y criminalidad).
Recien el a bishita veld bandona di Union Deportivo Savaneta (UNDESA) como tambe otro facilidadnan pariba di brug cu ta den un estado deplorabel. Di mucha y hoben Wendrick a hunga futbol pa Brazil Juniors y S.V. La Fama awor como hoben adulto e tin di wak e abandono di e veldnan cu un biaha el a practica su deporte cu tanto el a stima.
Loke e caso di Stichting Sportsubsidie Aruba (SSA) ta expone cu ta prioridad robes y falta di atencion tin pa deporte na Aruba. Bou di e gobierno aki no conoce un plan di vision pa deporte. Di su banda, Gabinete Eman I y II a introduci tarifa special di pa reduci prijs di coriente pa tur veld grandi cu luz y a yega na mas cu 50 facilidad deportivo pa haci trabaonan di mantencion, renobacion y construccion di mini soccer field y batting cage, etc. A construi espacio publico pa movecion y stimula movecion en general na Aruba mediante proyectonan di ciclovia.
El a bisa cu AVP a formula un plan di inversion, mantencion y vision pa deporte. “Nos lo formula un maneho cu lo yama ‘Sportvisie Aruba’ paso mester recupera e tempo perdi y alivia e daño haci na deporte riba nos isla. Den tur organizacion, facilidad y tur bario mester bay back na sostene nos talento local y duna deporte su importancia back. AVP ta compromete na inverti den facilidad y guia profesional pa facilita e proceso di crecemento di nos talentonan. Nos vision ta pa transforma e debe di pandemia di 900 miyon den un fondo di inversion cu lo fiha como prioridad pa inverti den deporte, nos deportista y organizacionnan deportivo; pa trata nan cu e balor cu nan merece.”
