Partido MEP ta convenci
- Diez dia despues di eleccion Mike Eman a laga promesa cay di hisa pensioen cu 700 florin den e prome 100 dianan
ORANJESTAD (AAN): Diamars 17 di december tabata un dia insolito. E ta e dia cu nos tur por a mira kico ta kiezersbedrog, manipulacion di eleccion.
Partido AVP a gana e eleccion di 6 di december, cu apenas 302 voto di diferencia. Nan no a crece den voto, sino a bay atras den voto. Ta un hecho cu nan a gana eleccion cu e promesa di hisa pensioen cu 700 florin den prome 100 dianan. Specialmente pensionadonan a deposita nan confiansa den e partido AVP y a duna nan e victoria.
P’esey e sorpresa tabata grandi ora cu 10 dia despues Mike Eman a admiti cu e tabata un promesa falso, cu e no por cumpli cu ne, y cu lo hisa e pensioen den diferente fase.
Esey no tabata e promesa cu a pone miles di hende bay vota p’e!
E promesa tabata cu lo hisa e pensioen den 100 dia y awor Mike Eman ta djis sali bisa cu e lo no cumpli cu ne mas.
Cu esaki un biaha mas Mike Eman y AVP ta pasa pa gañado, y a horta eleccion. Un partido cu a horta eleccion no tin derecho di forma parti den e siguiente gobernacion tampoco.
