Parlamentario Rocco Tjon:
ORANJESTAD (AAN): E siman aki a tuma luga un briefing tecnico di parti di Departamento di Finanzas den Parlamento di Aruba. Tur fraccion politico tabata presente.
Parlamentario Rocco Tjon a indica cu durante e presentacion a duna informacion riba e situacion financiero, e sistema di supervision y e proyeccion te cu 2030.
E presentacion y e cifranan presenta ta mustra claramente cu despues di Pandemia di Covid-19, Aruba a recupera fuerte. For di aña 2022 nos debe a cuminsa baha y for di 2023 nos tin atrobe surplusnan structural. Segun e proyecionnan ricibi, te cu 2030, si sigui cu e maneho responsabel, lo sigui tin surplusnan sigur y nos debe lo sigui baha.
No tin necesidad pa Rijkswet: A papia tambe riba e rijkswet financiero. Loke a resulta cu tin hopi asunto cu no ta cla ainda. Por ehempel, no por a duna un cifra concreto di cuanto Aruba lo bay ‘spaar’ na un interes mas abou pa cada aña.
Esaki ta depende di hopi factor cu ainda no tin claridad riba dje. E ta depende di e structura cu bay scoge, e ta depende di interes riba mercado, pero mas preocupante ta cu e ta depende tambe di locual cu Hulanda bay dicidi.
Ta hopi notabel cu e partido cu ta boga pa rijkswet, esta Partido Futuro, no a haci ningun pregunta durante di e reunion. Apesar cu Aruba su cifranan ta mustra cla cu nos debe ta baha y nos tin surplusnan, pues no tin necesidad pa un rijkswet, asina mes Gerlien Croes y su Parlamentarionan kier benta e rijkswet aki den strot di AVP, y bisanan guli manda abao.
