ORANJESTAD(AAN)- Na 2017, ora e supervision Hulandes na Aruba a bira mas visibel y informacionnan cu a cuminsa mira luz a cuminsa habri wowo di un pais ciega for di 2009, mas y mas
informacion cu a keda den sombra, a cuminsa bini dilanti.
DIARIO a considera cu ta su tarea pa repasa kico rapportnan oficial tabata indica den e tempo, cu gobierno di Mike Eman a pone Aruba baila y canta mientras Aruba tabata yega un abismo.
Documentonan ricibi ta papia di asuntonan cu ainda ta un problema pasobra Gobierno Mike Eman no solamente a uza placa pa locura total, pero den e documentonan aki ta bini dilanti cu placa a wordo abusa pa destrui e alma di Aruba, e cultura di Aruba, tur loke ta Aruba.
Uno di e editorialnan mas conoci di nos fundador y semper presente den nos trabou, Jossy Mehsen Mansur, a trata e introduccion di fietspad y tram pa Aruba.
Conceptonan Hulandes cu a wordo impone riba Aruba cu costo grandi pa e pueblo pero tambe cu kiebra di e cultural y tradicion Arubano manera for di e tempo Jossy Mansur a trece dilanti.
Kico e creacion di un “fake Aruba” cu 1.6 Miljard di Pueblo, a nifica, ta contenido di un carta cu a bay di comerciantenan di Playa pa Mike Eman den cual nan ta mustra con e tram di Mike a destrui comercio den caya grandi, cu ta carga nomber di e lider mas grandi cu Aruba a yega di conoce cu ta Betico Croes, cu a haci loke ningun otro lider a logra di haci.
Nos kier para keto un rato na e nomber original pa pueblo cu tabata Caya Grandi, pa ilustra cu esaki tabata e caya comercial principal di Aruba, cu a sobrevivi hasta ora shopping center a haci nan entrada.
E palabranan Caya Grandi, ta papia di e centro di e nucleo comercial pabou di brug, mientras pariba di brug na San Nicolas tambe tabata tin un Caya Grandi cu tambe un ambiente tremendo.
E centronan comercial tabata e luganan di reunion di pueblo, cu tabata topa otro. Autonan tabata pasa y hende tabata saluda otro, loke tabata crea actividad na estilo di Aruba cu ta un pueblo di union, di alegria, di bendicion comparti.
Turistanan tabata uni cu Arubianonan na e centronan cu a wordo afecta pa desaroyo.
San Nicolas a wordo afecta cu salida di actividad petrolero pero Caya Betico Croes a wordo afecta door di un tram, cu a costa Aruba cantidad di placa y cu a wordo rechasa manera e carta di 2016 di comerciantenan na Mike Eman ta duna prueba.
Un tram costoso, a destrui e Aruba berdadero mescos cu e brug, cu mester a construi na Paris y no den e alma Arubano, cu bishitantenan ta busca pa topa cu historia di Aruba, pa topa cu Aruba mes.
Nombernan di bario a cambia. E nombernan mara na historia ta lubida pasobra ta Green Corridor ta e proyecto. Un nomber cu bo ta haya rond mundo pero ta papia di e color di partido di Mike, cu ta mas importante cu tur cos.
DIARIO den su publicacionnan a dicidi di haci uzo di sitionan di Aruba, cu ta describi Aruba y e alma Arubano cu mester bolbe den centro di tur actividad.
E fortuna cu a wordo malgasta pa gobierno anterior, manera rapportnan oficial ta mustra, no por bolbe wordo uza pa restaura e gloria di Aruba, cu epoca Mike Eman a destrui.
Awe Aruba tin un tarea nobo. E infrastructura di Aruba mester wordo adapta na exigencianan moderno. Pero e infrastructura mester encera un base pa Arubiano y pa e pais Aruba, cu lo produci placa pa sigui edifica e nacion contrario na loke a pasa tempo di Gobierno Eman cu a uza placa di Aruba pa destrui e alma propio di Aruba y crea un Aruba caminda e Arubiano ta sinti falta di su cas.
E proyectonan di Gobierno Wever-Croes mester mester rebiba e centro di San Nicolas y e centro di Playa na un forma cu nan ta bira atrobe nucleonan Arubano, caminda e Arubiano ta gosa di e autenticidad di su pais.
