ORANJESTAD (AAN) – E lider di Partido ACCION 21, Miguel Mansur, despues di a reuni cu Gobernador den e contexto di consultanan pre-formacion di Parlamento nobo
y siguiente Gabinete (2021-2025), el a topa cu prensa cu tabata tin preguntanan pe.
Na prome lugar, Mansur a expresa cu e ta hopi gradici y ta sinti su mes hopi honra, cu 2.019 hende a deposita nan confianza den su persona, y kier duna nan tur un braza, si nan sa ken nan ta.
Mansur a expresa cu ta pa prome biaha cu 1/3 parti di e poblacion a vota contra e partidonan tradicional (grandi), y na su opinion e sistema anticua cu tin, no ta duna un reparticion husto di asiento. Aworaki tin cinco asiento y tres partido cu ta pafo di e partidonan grandi. El a bisa cu aworaki e reto ta con pa uni nos pais, e retonan di nos pais no a cambia, y Accion 21 kier wak un gobierno mas amplio posible, y no lo sostene un gobierno cu menos di 12 asiento, pero e mester ta mas amplio cu esey. Nan ta boga un Gabinete Nacional cu ta inclui tur partido, y pone politica un banda y ban enfoca riba pueblo.
E tin entendi cu tin conteo di votonan invalido y tin chens cu e por caba -8-8-2-2-1. El a reitera su punto cu Accion 21 no por sostene un gobierno di 12 of menos asiento y e nan ta keda pendiente di un Gabinete di unidad nacional of un forma pa Vak Ministers y tur partido ta bay den Parlamento.
Mansur a menciona cu dos aspecto historico a sosode cu e eleccion aki. Uno ta cu tin un caminda cu por haya un gobierno di 14 asiento, pa prome biaha den nos historia, e otro ta cu nos por caba cu un gobierno di 11-10, tambe pa prome biaha den nos historia, y cu den Parlamento lo por tin tres miembro di coalicion of oposicion.
