ORANJESTAD (AAN) – Vocero Policial, señora Liliana Rasmijn, den entrevista cu DIARIO a anuncia algun cambio cu ta bay tuma lugar, den e contexto di Campamento di Siman Santo.
Rasmijn a informa cu un di e cambionan ta tocante horario pa toca musica. Aña pasa tabata henter dia te cu 10 or di anochi, e aña aki ta stipula den e rekisitonan, desde 8’or di mainta te cu 8’or di anochi, y den fin di siman te 12’or di anochi tanten cu no ta un molester pa e bisiña na banda.
Tambe a bin cu rekisito pa decibel. E ta te 55 decibel. Liliana tin entendi cu e piscina portatil por tin’e pero mester wordo instala na un manera cu e ta riba un palet pero di plastic.
“Pues e mester tin un bon fondo y stabil tambe pasobra e controladornan lo bay pasa. Enfasis tambe ta cu BBQ grill no ta permiti absolutamente, riba e santo blanco. E mester wordo poni riba asfalt of klinkers, cu algo bao di dje pa proteha unda e ta wordo ubica, pero, absolutamente, riba santo blanco NO!” Liliana Rasmijn, Vocero di KPA, a subraya.
Otro aspecto pa tene cuenta cu ne ta cu BBQ grill ta riba gas so y nada di carbon. Esaki ta pa cuida nos beachnan, y pa basta tempo caba carbon no ta wordo permiti.
“Mester tene cuenta cu e permiso mester ta visible, cu mester ta poni un caminda den e area cu e personanan ta bezig ta campa, di manera cu asina polis pasa, e por controla di biaha”, Rasmijn a señala. Esaki ta pasobra tur cos mester ta manera e doño di e permiso a pone riba papel, y si ora di control ta resulta cu tin mas, e persona por perde su permiso ya cu tur cos mester paga p’e.
E aña aki tin mas peticion di campamento, locual señora Rasmijn a ratifica. En total ta 187 permiso cu ta 13 mas cu aña pasa, pero e cantidad di hende a baha, cu ta como 286 persona menos e aña aki.
“Un yamada pa esnan cu ta bay campa, pa por fabor respeta otro mescos cu bo a yega a pone tur bo cosnan dia bo bay, bay cu tur cos y no laga sushi atras. Tin hendenan cu a regla for di trempan pa un compania piki tur sushi y cada un ta paga un suma chikito, y cada tanto dia e compania mes ta pasa busca e sushi. Riba e muchanan, por fabor pone bista riba nan, y ora nan ta na canto di lama of den lama pa tin un adulto cu nan. No laga mucha cuida mucha, esaki ta un apelacion. Polis semper ta control tanto riba tera como na lama cu polis maritimo ta vigila”, vocero di Polis, Liliana Rasmijn a informa.
