ORANJESTAD (AAN): Dialuna atardi pa 5:35 pm, Central di Polis a manda patruya di Playa urgente pa Klipstraat,
na un edificio di 3 piso un tiki pariba di e Restaurant, como cu un hende ta hopi grave eyden y ta perdiendo rosea. E persona a cuminsa pidi pa auxilio tanto na spaño como na ingles, y e mes ta pidi pa yama Ambulans.
Ora cu Polis a yega na e adres, a bin haya algun hende cu a cuminsa practica CPR caba riba e persona masculino cu tabata bayendo fo’i tino. A sali na cla cu e persona masculino aki ta un turista di habla hispano, y el a drenta e edificio abandona aki na di dos piso pa bebe alcohol, y posiblemente tambe droga. E lugar no ta wordo usa, pues kizas nan ta usando e espacio di 2ndo piso pa ‘bati curpa cu droga’.
Paramediconan a yega y a nota sintomanan mesora cu lo por ta indicacion di overdose di droga. Sinembargo ya e ora ey, ni CPR y demas reanimacion no tabata yuda mas, y ora di pone e aparato di curason a detecta cu e no tin señal vital mas.
Mesora a pidi Centro di Alarma pa manda Docter. Unidad di Bombero tambe a yega na e lugar, y a manda busca Recherche. A seya e edificio, y a busca Team Forensico di BFTO y Polis a check e V-auto cu e turista a staciona den Klipstraat tambe, pa asina check cu e Car-Rental pa haya identificacion.
Vocero Policial Liliana Rasmijn a confirma cu Dr. Texier pa 6:20 pm a constata morto di e turista J.E. di 53 aña naci na Nicaragua, pero residencia na Merca. Fiscal a dicidi pa confisca e curpa pa investigacion, pa check si ta trata aki di crimen of no.
