ORANJESTAD (AAN): E prome boletin a drenta Diasabra atardi pa 2:13pm, pues esey ta momento cu Central di Polis ta wordo notifica cu un turista masculino a bira malo canto di lama na Palm Beach, y no ta reacciona.
Mesora un unidad di Polis di Strandpolitie a ser manda pa e lama banda di Divi All Inclusive y ta informa ambulance tambe.
Na yegada por a compronde cu e homber turista naci na Merca a sali di lama y bay drumi riba e stoel di beach. Despues a cuminsa sinti su mes malo y na dado momento e no a reacciona mas
Ambulance a yega na e lugar y a nota cu e persona no ta halando rosea, y mesora a cuminsa e procedura pa practica CPR pa trata na reanima e turista pero esaki tabata envano.
Despues cu a mira cu nan intento no ta logra, nan a pidi Centro di Alarma pa manda un Docter pa eynan. Pa 3:15 pm, Dr Mungra a constata morto di e turista J.A. Falco di 72 aña y naci na Merca.
Departamento di Bureau Slachtofferhulp a presenta pa brinda yudansa na famia di e fayecido.
Cuerpo policial ta manda palabra di condolencia na famia di e fayecido.
