Na Savaneta
ORANJESTAD (AAN): Diahuebs anochi yamada a drenta na Central di Polis, pa mustra cu e momento ey na Savaneta un caso di secuestro a caba di socede.
Pa tal motibo, pa 9:48 pm, unidadnan di Polis di San Nicolas nan tur a wordo manda den e area di Savaneta. E yamada ta indica cu tres homber cu pistol a secuestra un muher.
E prome unidad di Polis cu a yega na e adres, a bin haya un grupo di hende para riba e tereno di e cas unda esaki a socede.
Polis a papia cu e ciudadano di inicial B., kende a declara cu hunto cu su pareha di inicial I., nan a cana bay na e beach di Santo Largo. Na altura di e Cruzada-Y cu tin poco mas pariba, diripiente un auto di marca MG color shinishi a brake y para banda di nan.
Tres homber a baha for di e auto MG, y cana bin riba nan. Un di e hombernan a primi un obheto duro riba su lomba y a cuminsa fula na paña.
Na final, e tres hombernan aki a forza e muher I. den e auto, y nan a primi trot y desaparece den direccion pariba.
Polisnan mesora a pasa man pa nan Tetra-Radio y a suministra e informacion aki pa Central di Polis y tur otro unidad policial, di recherche, di K9 Unit, y unidadnan di brommer riba caya e momento ey, pa nan ta atento pa un MG color shinishi.
MUHER YEGA BEK: Mientras Polis ta atendiendo e ciudadano, ata diripiente na forma inespera, ata e muher di inicial I. a yega bek na e adres ey na Savaneta, cu un boter di whisky den su man.
Polis a core puntre ta kico a pasa. El a declara prome cu enberdad el a cana bay beach cu su pareha B. Pasobra cerca di beach e muher tin di bay topa un amiga.
El a bisa cu enberdad un auto shinishi a stop banda di nan, y el a kere cu ta su amiga ta den e auto. Pesey e mes a drenta e auto y ta e ora numa el a ripara cu ta trata di 3 homber desconoci. El a bisa cu e 3 hombernan aki a tene den e auto contra su boluntad. El a bisa cu el a trata di baha bek di e auto, y pesey el a dal uno di e hombernan ey cu un boter.
Mientras tanto un unidad riba caya a topa cu e MG shinishi aki den area di Do It Center na Savaneta. Den e auto tabatin solamente un homber di inicial H.
Nan a puntre ta kico a caba di pasa na Savaneta cerca di Santo Largo. El a bisa cu nan a bay busca e muher I. ey na altura di e Cruzada-Y, como cu esey ta un palabracion cu nan a haci di antemano.
Y el a bisa cu despues di a busca e muher I. aki, nan a bahe banda di Do It Center, cu ta como 350 meter so mas leu di eynan.
E unidad na Do It Center a comunica cu e Polisnan mas pabao na Savaneta, y a duna relato di e chauffeur. Polisnan a scucha esaki, y mesora a bay confronta e muher I. cu e storia aki.
Aki e muher a sinti cu su mascarada ta cayendo, y aki el a dicidi na basha abao y admiti cu enberdad el a drenta den e auto ey cu ta pertenece na su amigo. Pues nan no ta nada di hombernan desconoci. El a admiti tambe cu loke ta e storia cu el a caba di fabrica y inventa pa conta Polisnan anteriormente, no ta berdad.
Polis aki mesora a hala atencion severamente di tanto e homber B. como tambe e muher I. Nan a duna nan un splicacion di consecuencianan grave di haci melding falso, y cu esaki ta trece no djis varios complicacion, sino tambe ta un mal uso di tempo di Polis y demas unidadnan cu ta coriendo rond pa loco ta buscando.
Central di Polis na final a ser avisa cu no ta trata di secuestro. E ora tur e otro unidadnan coriendo rond tambe a wordo avisa pa cancela.
E muher I. sigur lo tin hopi cos di splica tambe pakico el a subi e auto ey, sin cu su pareha sa kico ta pasando. Pero si e pareha ta bay kere e muher, ta otro asunto pasobra e muher lo por bira gran ganador di “Premio Nacional di Gañamento 2022”.
