Manifestacion anti-vacuna no tabata tin permiso - ORANJESTAD (AAN): 'Samenscholingsverbod' ta conta pa camindanan publico.
Asina Alto Comisario Vanessa Tjon-Kock a remarca. El a splica cu no por tin 'samenscholingsverbod' den un establecimento, pasobra esaki ta conta solamente pa camindanan publico (openbare weg).
Por ehempel, ora cu tin un manifestacion of un protesta esaki ta bira un discusion pasobra un manifestacion mester un peticion pa un permiso, cual no a tuma lugar tampoco.
E manifestacion di diasabra no tabata tin permiso, pero semper por papia riba esaki cu e personanan. Cuerpo Policial ta habri pa delibera, a bisa.
Ora cu tin 'samenscholingsverbod' implementa ta pa evita cu tin manifestacionnan tambe pasobra no por tin e cantidad di hendenan riba camindanan publico na e forma ey, Tjon-Kock a splica.
Pa loke ta trata reunionnan paden di lugarnan, esun cu ta organisa e reunion mester por ta consciente di e forma con ta haci esaki. Mester tene cuenta cu distancia fisico, tapaboca, entre otro.
Alto Comisario a enfatisa cu 'samenscholingsverbod' ta conta specificamente pa camindanan publico.
