ORANJESTAD (AAN): Diamars a habri cu e informacion cu e asina yama “Afpakteam di Aruba” a tene un razzia den oranan di mainta na un oficina di Administratie Kantoor den Caya Frère Johannes na Paradijswijk.
Den e entrada hudicial aki, e oficialnan hudicial a detene un sospechoso femenino di inicial S. de Castro relaciona cu un investigacion di malversacion y estafa. E ta un consehero di impuesto, y ta duna servicio na clientenan cu su Oficina di Administracion.
Ministerio Publico a confirma na DIARIO, cu nan ta sospecha cu S. de Castro aki aki di malversa sumanan di placa di mas cu 2,4 miyon Florin, cu el a ricibi di clientenan pa el a bay entrega na Departamento di Impuesto (DIMP).
Durante e entrada hudicial, autoridad hudicial a confisca suma di placa cash, prendanan, administracion y computers. Segun Ministerio Publico, e investigacion no ta cla ainda.
Manera conoci, Afpakteam ta un cooperacion di Ministerio Publico, Polis, Aduana, Fiot (Fiscale inlichtingen- en opsporingsteam, Marechaussee, Kustwacht, Meldpunt ongebruikelijke transacties (Meldpunt) y RST. Afpakteam ta bringa crimen financiero economico y ta activo na Aruba desde 2017.
Pa tips y señalnan di labamento di placa por contact Afpakteam via tipline 111-41.
