Hoben gara cu arma tambe!
ORANJESTAD (AAN): Diadomingo mainta pa 7:05 am, un unidad di Polis di Noord a ser manda na un adres na Sabana Liber pa tende di persona aki di loke a pasa cune mas prome.
Polis a yega y papia cu e victima masculino di inicial J. Segun el a declara, cu algun rato prome el a bay busca su ruman muher chikito for di Olde Molen na Palm Beach. Ora di yega Olde Molen, su ruman muher a drenta den auto. Ora di sigui core, tabatin un auto staciona di tal forma, cu e mes no por a sali. El a expresa algo na e otro chauffeur, pero esaki no a ni reacciona.
Na final toch el a logra di pasa cuidadosamente y asina a logra sali di eynan pa regresa nan cas. Pero e cos no a caba eynan. Pasobra nan a bin ripara cu nan tabata wordo persigui riba caminda. Ta trata di un Kia Rio color cora cu V-nummer.
E victima J. a ricibi e momento ey varios message di e hendenan den e Kia Rio. Nan a manda un ‘location’ tambe unda e lo bay stop y warda nan. E personanan a bisa cu nan no kier problema, y pesey no kier pa Polis wordo envolvi. Nan a exigi pa nan so bin eynan na e lugar unda nan a para. Atrobe a ripiti cu nan no kier pa Polis contact nan. Pero despues di un rato e Kia a desaparece.
Asina J. a yega cas na Sabana Liber, y mientras e tabata stacionando e auto, su ruman muher a baha y bay paden. Inespera e Kia Rio a yega y para banda di chauffeur. Aki ta unda cu J. a ripara cu tin 5 homber color scur den e auto ey, y nan tur a baha. Uno di nan a cana bay na victima J., y a zwaai un mokete y dal’e na banda robez di su cara. Aki J. a core bay paden pa puntra su ruman muher, ta kende e hendenan eyfo ta, y a bise cu e tin di bay papia cu nan.
Despues J. a bay bek pafo, y aki a ripara cu ya caba e personanan a bay. El a cana bay na su auto, cu e no a laga na lock, cu ambos bentana baha. El a bin ripara cu su smartphone poni riba asiento a desaparece. El a bay puntra su ruman muher si e por haci un yamada na su smartphone. El a yama, y e di dos biaha porfin un hende a contesta.
- a bisa e persona cu e kier e smartphone bek, y ta dispuesto pa paga. E persona cu a contesta yamada tambe tabata dispuesto pa haci e transaccion aki.
Aki ta unda cu Polis a wordo envolvi den secreto. Polisnan a haya sa kico ta pasando, y cu e ladron ta dispuesto pa topa y entrega e smartphone. Agentenan a pone nan superiornan na altura, y a desea di haya sosten di mas patruya.
Polisnan a acudi cerca di e scol na Madiki pa aki “formula un plan”. A bin haya sa cu e grupo di Kia Rio lo topa pafo di Stadion di Riverplate. Polisnan a bay staciona un tiki leu. Pero den e auto di J., a bay 2 agente policial scondi sinta patras. A consulta cu Fiscal tambe riba loke nan ta haciendo.
Ora cu a yega pafo di Stadion di Riverplate, a palabra cu Polis lo actua te despues cu e traspaso wordo haci. E ora numa Polisnan lo baha di auto, y e patruyanan lo presenta. Na momento cu e smartphone a cambia di man, mesora Polisnan a sali y aglomera ey rond. Nan a wanta e homber color scur, kende a resulta di ta un persona menor di edad bon conoci pa Polis y Husticia.
A consulta cu Fiscal, kende a duna luz berde pa aresta e hoben. Den su poder a haya un arma tambe. Esaki a wordo confisca, y e hoben a wordo hiba Warda di Polis, y pasa pa seccion JZP pa sigui cu e investigacion.
