Plantacion grandi descubri na Sabanilla Abao
ORANJESTAD (AAN): E ta un investigacion andando pa algun tempo caba. Danki na tip y tambe trabao incansable di investigacion manual y cu hopi dedicacion, autoridadnan anti-droga na Aruba a bin ta realizando cu tin algo ‘grandi’ scondi na un cas parti patras di Santa Cruz.
Asina a cuminza cu un consulta cu Ministerio Publico, y a base di datonan disponibel, Fiscal a bay di acuerdo pa nan tene un razzia inespera riba Diahuebs mainta.
Pesey mes, prome cu solo a sali, e mainta ey diferente oficial arma, hunto cu Unit Narcotica di Polis a haci un entrada hudicial na e cas sospechoso na Sabanilla Abao. Durante e operacion di sorpresa, a rondona full e cas pa evita cu cualkier hende por huy. Polisnan a drenta y a detene dos homber di 22 y 23 aña di edad, tur dos naci na Aruba, y nan ta di fam F.
Polisnan a cuminza busca riba tereno di e cas, y nan a canta ‘bingo’. Pasobra patras riba e tereno, e oficialnan anti-droga a descubri un plantacion cu mas cu 200 mata di marihuana.
Vocero di Polis Liliana Rasmijn, a confirma cu ademas di e plantacion di cannabis, tabatin tambe un cantidad considerabel di marihuana ya caba procesa, empaketa, y tabata cla pa distribucion y benta. Pues ademas di cosecha marihuana, nan ta manera un centro di distribucion pa dealernan local.
E investigacion aki ta mustra un biaha mas e trabao intensivo cu polis ta haci pa combate trafico y abuso di droga na Aruba.
E accion tabata bao di un coordinacion di polis uniforma di Noord y Santa Cruz, hunto cu K9-unit, Flex Team y RRT.
Cuerpo Policial ta sigui pidi colaboracion di comunidad. Si bo tin informacionnan relaciona cu e caso, bo por yama e tipline cu ta 111-41. Corda cu nan ta garantiza cu bo ta keda anonimo.
