Minister di Husticia Arthur Dowers:
*Sinta na mesa mester yega na solucion
ORANJESTAD (AAN)-- Minister di Husticia, mr. Arthur Dowers, ta sinti cu tin un necesidad grandi pa tin suficiente hende pa traha, y e trahadornan di Recherche a demostra cu nan ta dispuesto pa sinta na mesa y yega na un solucion.
Asina e mandatario a bisa, ora cu e trahadornan tabata para pafo di e edificio como muestra di descontento.
Minister Dowers a splica, den entrevista cu Matutino DIARIO, cu el a pidi e trahadornan pa reanuda nan trabao, y pa nan bay sinta na mesa e mes lo tuma contacto cu leiding di KPA, pa palabra un ke otro. “Mi ta kere cu ta importante pa bay mesa sinta cu otro, y yega na un solucion. Con cu bo bire, of mire, nan ta hendenan cu tin hopi experiencia den Recherche. Hendenan cu a traha henter nan carera, algun di nan bo por bisa.
Casi 30 aña trahando den Recherche, esaki ta nifica cu e parti mas grandi di bo bida bo teynan, y ta nifica cu bo sa kico ta come y bebe eynan, pues mester tene cuenta cu ne. Nos, no necesariamente, ta esun cu ta traha hopi aña ta esun cu leiding di organizacion, e ta wordo apunta pa duna leiding, pero esey no kiermen cu nos no por tene cuenta cu opinion di esnan cu ta haci e trabao. E peticionnan pa yega na un solucion, pa laga nan wordo scucha, esey tambe mi ta bay pidi na KPA, aki rato”, Minister di Husticia a declara.
E mandatario a menciona cu mester papia tocante algun punto cu a cambia den recherche, y toch mester papia pa pone algun recherche mas pasobra e personal cu tin no por haci tur cos, y mester preveni si acaso un ta cay afo.
“Mi ta kere cu si tur hende duna di nan parti, si tur ta scucha otro, y tende e seriedad di e situacion tur hende ta realiza cu mester haci algo aworaki, urgente. Mester tin solucion na largo plazo, pero si t’asina cu tin departamentonan aworaki cu ta bao presion, y ta nifica cu e servicio cu por duna ta bira menos, y mi ta kere cu pueblo tin derecho na un servicio optimal, of alomenos haci miho cu loke nos ta haciendo awo”, Minister di Husticia Arthur Dowers a declara.
