ORANJESTAD (AAN): Tabata Diasabra anochi poco prome cu 8:00 pm, cu un unidad di Polis di Noord a ser manda den area di Palm Beach Plaza relaciona cu un caso di hincamento, unda e victima ta un mucha homber di 13 aña.
Polis a sigui haya informacion cu e mucha homber a haya
hinca den su garganta. Polis a yega den e area, y riba e acera net dilanti cura di e lugar, nan a mira e hobencito abao na suela. Polis tambe a yega, y mirando e seriedad, a dicidi pa hiba e hoben rumbo pa Servicio di Emergencia na Hospital pa mas tratamento. Polis na su turno a notifica e mama, y tambe Bureau Slachtofferhulp.
Despues di esey, un unidad di Strandpolitie tabata hunto cu Polis di Noord riba e parkinglot di Holiday Inn Resort Aruba, relaciona cu un grupo di hoben kendenan a trata di core bay. Polis a para nan y a papia cu nan riba e pelea cu a socede cerca di Palm Beach Plaza, unda un mucha homber a wordo hinca.
Polis a busca vehiculo special pa bay cu tur e hobennan di eynan, y hiba nan Warda di Polis na Noord.
Strandpolitie despues a bay para na e Parada di Bus cu tin otro banda di Paseo Herencia Mall. Aki e agentenan a wordo acerca door di un ciudadano y un hoben. E ciudadano di inicial D., a indica na Polis cu su yiu homber menor di edad a wordo maltrata door di un hoben na Palm Beach Plaza, y cu e ta desea di entrega keho. Polisnan a puntre ta kico a socede.
E hoben a relata na Polisnan cu e tabata eynan hunto cu un amigo. Diripiente nan a wordo rondona pa un grupo di hoben na un forma menazante. E hoben a reconoce e persona cu a maltrat’e, y e ta di inicial K.
E hoben a bisa cu e K. a hinca su man den carson, y kier a saca algo. Polis a nota cu e tin un bolombonchi basta grandi na su frenta.
Polis a conseha e ciudadano y su yiu pa nan bay Warda di Polis na Shaba pa asina haci denuncia oficial di loke a socede.
