Cuerpo Policial
ORANJESTAD (AAN): Lamentabelmente Cuerpo Policial Aruba ta informa cu e peaton cu a wordo alcansa riba e caminda di Pos chikito a fayece diaranson den oranan di merdia.
Ta asina cu dia 5 di oktober 2026 pa mas o menos 19:41 di anochi central di polis ta wordo notifica cu un Van lo mester a alcansa un peaton ( hende homber) riba e caminda principal di Pos Chikito na altura di Rey Hing.
Central di polis ta despacha polis como tambe ambulance na e sitio di e sucedido.
Na yegada di polis ta bin topa cu un homber ariba caminda y ta mustra grave. Ambulance ta yega na e sitio y paramediconan ta duna asistencia na e victima, a stabilis'e prome y despues a transport'e cu maximo urgencia pa hospital.
Su situacion e momento ey tabata critico y a keda interna den cuido intensivo.
E prome informa ta cu un Van, Hyundai Staria color blauw, bayendo direccion pariba lo a alcansa e peaton.
Specialista di trafico y polis tecnico a presenta pa haci nan investigacion. Tambe departamento di Slachtofferhulp a wordo poni na altura.
Diaranson 14 di oktober 2026 den oranan di merdia Polis di Trafico ta wordo informa cu e peaton a fayece na hospital.
Ta trata di e hende homber Julian Rambalde naci na Republica Dominicana dia 20 di februari 1963 (63 aña).
DIARIO y Cuerpo Policial Aruba ta manda palabra di condolencia na famia di e fayecido.
Cuerpo Policial ta haci un apelacion na comunidad pa bay trankilo den trafico, pone atencion riba caminda, baha velocidad y sigui e reglanan den trafico. Un trafico sigur ta responsabilidad di nos tur.
