ORANJESTAD (AAN): Un situacion peligroso a presenta su mes Diaranson merdia na e rotonde di Avenida Nelson Oduber, net na altura di Eagle Bowling Palace.
Diripiente chauffeur di un Nissan March (modelo di aña 2013 bay ariba) a bay dal den un Nissan Almera. Envez di stop pa asina atende e accident, e chauffeur di e Nissan March a dicidi na primi trot direccion Palm Beach y huy di su responsabilidad.
E tipo di hendenan aki no merece di ta den sociedad. Pa suerte, e dama chauffeur di e Nissan Almera no a perde pa gana, y a bay su tras y a saca e potret aki.
Pa colmo, na altura di e rotonde di Super Food, na Bubali, e dama a pasa dilanti e Nissan March color shinishi aki, y a obliga nan pa stop. Den e auto tabatin un homber y un muher.
Pero ni asina e chauffeur di e Nissan March no kier a stop, y den su intento pa huy el a hasta dirigi auto riba e dama cu ta para pafo pa stop nan. E dama a haye obliga di bula un banda, sino e Nissan March aki a dal e.
Como cu e dama ta bayendo trabao, e no por a persigui e auto aki.
DIARIO a compronde cu ya caba e caso ta den man di Polis. E asunto ta bira uno serio, pasobra ora bo ta manda auto riba hende, e ta cay den categoria pa cual e codigo penal di Aruba tin castigo exigi pa esey.
Di e forma ey, e pareha den e Nissan March aki color shinishi, a sigui huy y a desaparece, cu nan bumper dilanti keto bay kibra tambe. Kizas nan ta stranhero ilegal. Kizas nan no tin ningun aseguro. Kizas nan tabata huy di un otro crimen cu nan a caba di comete.
Pero awor nan tin di djis warda Polis bin bati na nan porta. Si acaso abo ta reconoce e auto aki of bo sa na kende e ta pertenece, bo por yama Tipline di Polis na 111-41.
