ORANJESTAD (AAN): Mas di US$ 270.000 na balor di droga a wordo descubri den un pakete di Louisville (Kentucky), segun un boletin di US Customs and Border Protection (CBP) a indica.
E funcionarionan di CBP a nota algo raro cu e peso di un pakete cu ta pasando via e sistema di courier na e hub di United Parcel Service na Kentucky (Merca). E pakete ta contene tres pintura cu ta lora den forma di rol.
Aki ta unda e funcionarionan a traha un buraco chikito den e pinturanan aki, y a descubri un substancia blanco cu a wordo confirma despues cu e ta cocaina. E cocaina aki tin balor di riba 200.000 Dollar.
Segun US Customs and Border Protection, e rolnan di e pintura aki a wordo manda via UPS for di Aruba y ta rumbo pa Madrid, Spaña. Sinembargo como cu ta UPS, tur cargo tin di bay via e hub cu nan tin na e facilidad na Louisville, Kentucky.
Riba e potret suministra pa CBP, por mira e rol di pintura ora cu nan a wordo habri na Louisville, Kentucky.
Na e mesun hub aki di UPS, un otro pakete cu a yega for di Mexico, tabata contene loke ta parce di ta paña pa cubri mesa cune. Atrobe e oficialnan a keda sorprendi cu paña por pisa asina hopi.
A bay analiza e paña di mesa aki, y a descubri cu e pañanan aki a wordo baña den droga meth y tabatin un balor riba caya di casi US$ 70.000. E pakete di paña di mesa tabata rumbo pa un adres na Georgia, na Merca mes.
