Diasabra mainta na Aruba
- Grupo di 8 hoben deteni pa evita di ocasiona mas violencia
ORANJESTAD (AAN): Autoridadnan hudicial a actua rapido riba Diasabra, basa riba inteligencia cu nan a ricibi durante siman cu a pasa, for di e marduga cu tabatin actonan violento cu a socede durante Parada di Jouvert Morning di siman pasa.
Diasabra autoridadnan a detene varios persona relaciona cu incidentenan di violencia cu a sucede riba 15 di februari ultimo durante Jouvert. E incidentenan di violencia aki, cu a inclui violencia publico, agresion y un tiramento, tabatin di haber cu rivalidad entre gangs.
Den e cuadro ey polis tabatin anteriormente dos persona den detencion caba. Awor aparentemente a detene 6 persona mas, aunke Ministerio Publico no a menciona e cifra ey.
Un boletin emiti den fin di siman door di Ministerio Publico, ta indica cu Fiscal y Polis ta decidido pa garantiza seguridad den Carnaval 71.
Pues por mira cu e accion di razzia y detencion aki riba Diasabra marduga, lo por ta indicacion cu inteligencia a capta un posible menaza pa eventonan Carnavalesco di sea Diasabra anochi of Diadomingo atardi na San Nicolas, y pesey pa de-escala e peligro, a core aresta e seis extra persona. Pues awor tin 8 hende deteni.
Polis tin e tarea di mantene ordo y lo haci tur esfuerzo pa asegura cu e festividadnan sigui sin contratiempo.
Pesey cu a tuma diferente medida desde principio, incluso e controlnan preventivo (preventief fouilleren) cu ya caba ta andando.
E seguridad di tur participante, di publico en general y di muchanan en particular ta primordial.
Ministerio Publico y polis ta traha hunto den colaboracion estrecho pa make sure cu tur hende por gosa di Carnaval na un manera sigur y placentero.
Recherche ta trahando intensivamente riba e investigacion di e incidentenan di violencia, y no ta descarta mas detencion. E sospechosonan lo wordo presenta dilanti huez. E lo dicidi si nan mester keda den detencion preventivo pa mas tempo.
