ORANJESTAD (AAN): Tabata Diasabra marduga banda di 2:00 am, cu un unidad di Polis di Playa a ser manda na Cas Casuela na Tanki Leendert pa un pelea.
Ora cu Polis a yega eynan, e agentenan a bin topa cu un ciudadano kende ta canando mey-mey di caminda. Yegando mas cerca, Polis a bin tuma nota cu e frenta di e persona ta tur na sanger. A ilumina su cabez cu flashlight y a nota cu tin sanger ta sali
for di ambos orea.
E ciudadano a bisa Polis cu e tin hopi dolor na su cara banda drechi. Polis a papia cu e ciudadano aki di inicial C., kende a relata na nan cu cuatro persona a caba di maltrate. Ta trata aki di dos hoben masculino, y dos hoben femenino.
Segun C. a splica Polis, cu un di e hobennan femenino aki a bay orina banda di su negoshi. Pesey el a bay papia y hala su atencion cu esaki no por, y a menaza di yama Polis si e haci esey.
Despues el a mira cu e hoben femenino a cana bay Cas Casuela y bay paden. Mirando e hecho cu mas trempan den siman un hende lo a djis sak y laga sushi humano riba e piso dilanti su cas, aki C. a dicidi bay sinta banda di su negoshi pa evita cu hende ta bay orina of laga sushi humano eynan atras.
Ora cu e hobennan femenino a sali pafo bek di Cas Casuela, nan no a sali nan so. Nan a bin cu dos hoben masculino. E hobennan a bin riba dje y a avise pa no papia mas cu nan amiganan, y a djis cuminza manda mokete riba su cabez.
Nan a keda yena su cara cu mokete na forma agresivo, y esaki a pone perde balans y a cay na suela. Unavez abao, e dos hobennan a cuminza lastre riba suela.
Pero e ciudadano C. a bisa cu el a lanta bek, y mesora a dal y kibra e bentana patras banda drechi di nan auto, cu ta un Nissan March color di plata. Ora cu el a haci esaki, tur hende a cuminza core bay. El a trata di core nan tras, pero e tabatin hopi dolor na su pianan.
E cuatro persona cu tabata envolvi, pues a core bay, y pa colmo un di e hoben femenino a bay cu su smartphone tambe.
E ciudadano C. a bisa cu ambos hoben tin color di cuero cla. Un di e hobennan ta bisti cu Shirt blanco cu short blauw y tin un postura delega. E otro hoben tabata tur bisti na preto. Un di e hoben femenino tabatin color di cuero cla, cu cabey blond curly, cu un shirt roos cu jeans blauw bisti. E otro hoben femenino tabatin color di cuero bruin, y cabey bruin.
Ambulans a yega na e lugar y Paramediconan a atende e ciudadano C. cu tur e golpi na su cara.
Como cu ta trata aki di un caso di maltrato severo, cu sigur por tin castigo pisa den Corte, nan a conseha e ciudadano pa entrega keho na Recherche di Playa.
Na final, e unidad di Polis a pone Hefe di Servicio como tambe Central di Polis na altura di e sucedido grave aki.
Si acaso abo tin informacion, y sa kende e hobennan aki ta cu a huy di eynan den e Nissan March color shinishi/plata aki, por yama Tipline di Polis na 111-41 pa asina duna informacion. Corda cu bo por keda anonimo.
