Señor Francel Bernardus di SPA:
ORANJESTAD (AAN): Ladronicia ta keda un problema grandi na Aruba, specialmente den espacionan publico na e area hotelero. Segun señor Francel Bernardus, Vicepresidente di Sindicato SPA, a declara na DIARIO, nos leynan ta bon y control di polis ta suficiente, pero castigo y boetnan ta demasiado tiki. El a expresa cu mester hisa e castigonan pa haci ciudadanonan cu ta comete e actonan aki bira mas consciente di nan responsabilidad.
Segun e, articulo di ley ta stipula un castigo te 4 aña pa hortamento, pero na practica, casi niun hende ta haya e castigo aki na Aruba. Despues di algun luna, nan ta atrobe riba caya y ta bolbe comete ladronicia. E problema aki tin un “domino effect”: esnan cu a comete ladronicia ta drenta KIA pa un periodo hopi cortico, ta sali bek, hopi biaha pasobra KIA ta yen y mester luga pa otro detenidonan, y despues ta bolbe comete fechorianan. Aki, segun señor Bernardus, ta unda e problema ta sinta.
El a agrega cu, si un persona cu ta horta sinta e castigo por lo menos pa dos aña, lo tin un alivio pa por lo menos e mes cantidad di tempo, especialmente si e persona ta parti di un grupo cu ta comete ladronicia regularmente. Un solucion, segun e, por ta pa tene nan deteni mas tempo, te unda cu ta legalmente posibel.
Pa loke ta trata e adictonan ambulante, señor Bernardus a remarca cu nan ta wordo considera como personanan cu problema mental, y nan no ta keda deteni, mientras si nan ta sigui causa daño na comunidad. Pa e situacion aki, mester bin un solucion lihe. El a agrega cu, durante un reunion cu Minister di Husticia Arthur Dowers, e minister a indica cu Gobierno ta trahando riba un proyecto y ta buscando un luga pa pone e adictonan ambulante bao di curatela.
